নিয়মীয়া বাৰ্তা ডিজিটেল, ২০ ফেব্ৰুৱাৰীঃ আগন্তুক ৫ৰ পৰা ছমাহৰ ভিতৰত দেশৰ বজাৰলৈ আহিব মাৰণ ৰোগ কেঞ্চাৰৰ ভেকচিন৷ অৱশ্যে কেৱল মহিলাৰ বাবেহে এই ভেকচিন আহিব৷ সংবাদ মাধ্যমৰ ওচৰত এই দাবী কৰিছে কেন্দ্রীয় স্বাস্থ্য মন্ত্রালয়ৰ ৰাজ্যিক মন্ত্রী প্রতাপ ৰাও যাদৱে৷ সাংবাদিক সন্মিলনত কেন্দ্রীয় মন্ত্রীগৰাকীয়ে উল্লেখ কৰা অনুসৰি, ৯ৰ পৰা ১৬ বছৰ বয়সৰ কিশোৰী তথা তৰুণীসকলক দিয়া হ’ব কর্কট ৰোগৰ ভেকচিন৷ যাদৱে এই কথাও উল্লেখ কৰে যে কর্কট ৰোগৰ ভেকচিনক লৈ গৱেষণা প্রায় সম্পূর্ণ হৈ উঠিছে৷ বর্তমান চলি আছে পৰীক্ষা৷ দেশত কর্কট আক্রান্ত লোকৰ সংখ্যা ক্রমান্বয়ে বৃদ্ধি পোৱা বুলি উল্লেখ কৰি মন্ত্রীগৰাকীয়ে কয় যে এই বিষয়টোক লৈ চিন্তিত কেন্দ্রীয় চৰকাৰ৷ ৩০ বছৰৰ বেছি বয়সৰ মহিলাসকলৰ হাস্পতালত স্ক্রীনিং কৰা হ’ব আৰু ৰোগৰ প্রাথমিক চিনাক্তকৰণৰ বাবে ডে–কেয়াৰ কেঞ্চাৰ চেণ্টাৰ স্থাপন কৰা হ’ব বুলিও মন্ত্রীগৰাকীয়ে সংবাদ মাধ্যমক জনাইছে৷ লক্ষণীয়ভাৱে কর্কট ৰোগৰ চিকিৎসাত ব্যৱহূত ঔষধৰ কৰ হ্রাস কৰা বিষয়টোও উল্লেখ কৰে মন্ত্রী যাদৱে৷ মন্ত্রীগৰাকীয়ে ভেকচিন বিধৰ বিষয়ে সবিশেষ জনোৱা নাই যদিও যিসকল তৰুণী তথা কিশোৰীক এই ভেকচিন প্রদান কৰা হয় তেতিয়া তেওঁলোকৰ স্তন আৰু মুখমণ্ডলৰ কর্কট ৰোগ নিয়ন্ত্রণ হ’ব৷ অর্থাৎ সকলো কর্কটৰ বাবে এই ভেকচিন নহয়৷ মহিলাৰ সকলো কর্কট ৰোগ এই ভেকচিনে নিয়ন্ত্রণ কৰিবনে নাই সেই কথা উল্লেখ কৰাৰ পৰা বিৰত থাকে মন্ত্রী যাদৱ৷ স্মর্তব্য যে ইতিমধ্যে ৰাছিয়াই মাৰণ ৰোগ কর্কটৰ ভেকচিন আৱিষ্কাৰ কৰা বুলি দাবী কৰিছে৷ একল সেয়াই নহয়, দেশখনে এই ভেকচিন সাধাৰণ জনতাক প্রদান কৰিবলৈ লোৱা বুলিও ঘোষণা কৰিছে৷