পেহেলগামৰ নাৰকীয়তাৰ বাবে যিকোনো প্ৰকাৰৰ পদক্ষেপ লবলৈ সাজু চৰকাৰ, প্ৰতিৰক্ষা মন্ত্ৰী ৰাজনাথ সিং

নিউজ ডেস্ক, ২৩ এপ্ৰিলঃ পেহেলগামৰ সন্ত্ৰাসবাদী আক্ৰমণক তীব্ৰ গৰিহণা দিছে প্ৰতিৰক্ষা মন্ত্ৰী ৰাজনাথ সিঙে। তেওঁ দেশবাসীক আশ্বাস দিয়ে যে চৰকাৰে প্ৰয়োজনীয় প্ৰতিটো পদক্ষেপ গ্ৰহণ কৰিব। প্ৰতিৰক্ষা মন্ত্ৰীগৰাকীয়ে কয়, “পেহেলগামত সন্ত্ৰাসবাদীয়ে এটা বিশেষ ধৰ্মক লক্ষ্য কৰি এক কাপুৰুষালি কাৰ্য্য সংঘটিত কৰিছিল, য’ত বহু নিৰীহ লোকে প্ৰাণ হেৰুৱাইছিল। মই দেশবাসীক আশ্বস্ত কৰিব বিচাৰো যে চৰকাৰে প্ৰয়োজনীয় প্ৰতিটো পদক্ষেপ গ্ৰহণ কৰিব। আমি কেৱল এই কাৰ্য্যৰ ষড়যন্ত্ৰকাৰীৰ ওচৰলৈ গৈ পোৱাই নহয়, পৰ্দাৰ আঁৰত থকা ৰাইজৰ কাষ চাপিম।”

প্ৰতিৰক্ষা মন্ত্ৰী ৰাজনাথ সিঙে কয়, “আমাৰ দেশে সন্ত্ৰাসবাদীৰ কাপুৰুষালিৰ আক্ৰমণত বহু নিৰীহ নাগৰিক হেৰুৱাইছে। এই অমানৱীয় কাণ্ডৰ বাবে আমি সকলোৱে গভীৰ শোক আৰু যন্ত্ৰণাত ভুগিছো। প্ৰথমতে আপোনজনক হেৰুওৱা সকলো পৰিয়াললৈ গভীৰ সমবেদনা জ্ঞাপন কৰিছো। এই দুখৰ সময়ত বিদেহ আত্মাৰ শান্তিৰ বাবে ভগৱানৰ ওচৰত প্ৰাৰ্থনা জনাইছো।”

প্ৰতিৰক্ষা মন্ত্ৰীগৰাকীয়ে কয়, “সন্ত্ৰাসবাদৰ বিৰুদ্ধে আমাৰ শূন্য সহনশীলতা নীতি আছে। ভাৰতৰ প্ৰতিজন নাগৰিক এই কাপুৰুষালিৰ বিৰুদ্ধে একত্ৰিত। ভাৰতক ভয় খুৱাব নোৱাৰি। মই দেশবাসীক আশ্বস্ত কৰিছো যে এই ঘটনাৰ প্ৰতি লক্ষ্য ৰাখি ভাৰত চৰকাৰে প্ৰয়োজনীয় আৰু উপযুক্ত প্ৰতিটো পদক্ষেপ গ্ৰহণ কৰিব।”

আজি পেহেলগামত সংঘটিত সন্ত্ৰাসবাদী আক্ৰমণৰ পিছত জম্মু-কাশ্মীৰৰ নিৰাপত্তা পৰিস্থিতিৰ পৰ্যালোচনা কৰে প্ৰতিৰক্ষা মন্ত্ৰী ৰাজনাথ সিঙে। এই বৈঠকত প্ৰতিৰক্ষা মুৰব্বী জেনেৰেল অনিল চৌহান, তিনিওখন সেৱাৰ মুৰব্বী, প্ৰতিৰক্ষা সচিব আৰু সেনাবাহিনীৰ সামৰিক অভিযানৰ সঞ্চালক প্ৰধান উপস্থিত থাকে। সন্ত্ৰাসবাদ বিৰোধী অভিযান তীব্ৰতৰ কৰিবলৈ সশস্ত্ৰ বাহিনীক নিৰ্দেশ দিয়ে প্ৰতিৰক্ষা মন্ত্ৰীগৰাকীয়ে।