নিয়মীয়া বাৰ্তা ডিজিটেল, ২০ আগষ্টঃ কোনো কাম নাই, গোটেই দিনটো ঘৰত বহি থাকি পিতৃক ভৰি মালিচ কৰাৰ নির্দেশ দিছিল পুত্রই৷ এই প্রস্তাৱ মানিবলৈ ৰাজী নহ’ল পিতৃ৷ ইয়াৰ বাবে ৬২ বছৰীয়া পিতৃক নৃশংসভাৱে প্রহাৰ কৰি হত্যা কৰিলে ‘গুণধৰ’ পুত্রই৷ চাঞ্চল্যকৰ এই ঘটনা ঘটিছে মহাৰাষ্ট্রৰ পুণেত৷ ঘটনাৰ তদন্তত নামি ২৩ বছৰ বয়সীয়া অভিযুক্ত কুশল ওৰফে ইংগা চেণ্ডেক গ্রেপ্তাৰ কৰিছে আৰক্ষীয়ে৷ আৰক্ষী সূত্রই সদৰী কৰা অনুসৰি পুণেৰ নবাবপুৰা অঞ্চলত পিতৃ দত্তাত্রেয় চেণ্ডেৰ সৈতে একেলগে আছিল কুশল৷ শনিবাৰে পিতা–পুত্র দুয়োজনেই ঘৰতে আছিল৷ সেই সময়ত পিতৃক ভৰি মালিচ কৰিবলৈ প্রস্তাৱ দিয়ে অভিযুক্ত কুশলে৷ কিন্তু কুশলৰ প্রস্তাৱ মানিবলৈ সন্মত নহ’ল পিতৃয়ে৷ এই ঘটনাত ক্ষুব্ধ হৈ পিতৃৰ বুকু, পেট আৰু মূৰত উপর্যুপৰি প্রহাৰ কৰে কুশলে৷ ইয়াৰ ফলত ঘটনাস্থলীতে পিতৃৰ মৃত্যু হয়৷ এই ঘটনাক লৈ সমগ্র অঞ্চলটোত সৃষ্টি হৈছে চাঞ্চল্য৷