নিয়মীয়া বাৰ্তা, ২০ নৱেম্বৰঃ মাৰাত্মক ক’ভিড–১৯এ দেশজুৰি শংকাৰ পৰিৱেশ সৃষ্টি কৰি থকাৰ সময়তে তিনি–চাৰি মাহৰ ভিতৰতে ক’ৰোনা ভাইৰাছৰ ভেকচিন সাজু হৈ উঠিব বুলি মন্তব্য কৰিছে কেন্দ্রীয় স্বাস্থ্যমন্ত্রী হর্ষবর্ধনে৷
ক’ভিড–১৯ ভেকচিনক লৈ উৎকণ্ঠিত হৈ থকা দেশবাসীক ইতিবাচক বতৰা দি কেন্দ্রীয় স্বাস্থ্যমন্ত্রীগৰাকীয়ে কয় যে তেওঁৰ দৃঢ় বিশ্বাস পৰৱর্তী তিনি–চাৰি মাহৰ ভিতৰতে ক’ভিড–১৯ ভেকচিন সাজু হৈ উঠিব৷ বিজ্ঞানভিত্তিক ডাটাৰ আধাৰত প্রস্তুত কৰা ভেকচিনবিধ প্রয়োগৰ ক্ষেত্রত স্বাস্থ্যকর্মী আৰু ক’ৰোনা যোদ্ধাক স্বাভাৱিকভাৱে প্রাধান্য দিয়া হ’ব৷ ইয়াৰ পাছতেই বয়োজ্যেষ্ঠ আৰু বিভিন্ন ৰোগত আক্রান্ত লোকক প্রাধান্য দিব চৰকাৰে৷ এফ আই চি চি আই এফ এল অ’ ৱেবিনাৰ ‘দ্য ছিফটিং হেল্থ কেয়াৰ পাৰাডিগম ডিউৰিং এণ্ড পোষ্ট ক’ভিড’ত অংশ লৈ স্বাস্থ্যমন্ত্রী হর্ষবর্ধনে ভেকচিনক লৈ এই মন্তব্য কৰে৷ তিনি–চাৰি মাহৰ ভিতৰতে ক’ভিড–১৯ ভেকচিন সাজু হৈ উঠিব বুলি মন্তব্য কৰা স্বাস্থ্যমন্ত্রীগৰাকীয়ে পুনৰ কয় যে ২০২১ বর্ষৰ জুলাই–আগষ্টৰ ভিতৰত ৪০০–৫০০ নিযুত ড’জ দেশত উপলব্ধ হ’ব৷ এই ড’জৰ জৰিয়তে ২৫–৩০ কোটি লোকক ক’ভিড–১৯ ভেকচিন প্রয়োগ কৰিব পৰা যাব৷
ইফালে ক’ভিড যোদ্ধাৰ সন্তানৰ বাবে এমবিবিএছ পাঠ্যক্রম অধ্যয়নৰ ক্ষেত্রত ৫খন আসন সংৰক্ষিত কৰিবলৈ কেন্দ্রীয় চৰকাৰে সিদ্ধান্ত গ্রহণ কৰাৰ কথাও উল্লেখ কৰে মন্ত্রীগৰাকীয়ে৷ তাৎপর্যপূর্ণ যে দেশত আক্রান্তৰ সংখ্যা ৯০ লাখ স্পর্শ কৰাৰ দিশে৷ তেনেদৰে মৃতকৰ সংখ্যা ১.৩১ লক্ষাধিক৷ ক’ভিড–১৯ৰ প্রথমটো দেশীয়ভাৱে বিকশিত ভেকচিন ‘ক’ভাক্সিন’ৰ তৃতীয় পর্যায়ৰ মানৱ দেহত পৰীক্ষণ আৰম্ভ হৈছে৷ ভাৰত বায়’টেক আৰু আই চি এম আৰৰ দ্বাৰা বিকশিত এই ক’ভাক্সিনক লৈ কেন্দ্রীয় চৰকাৰ আশাবাদী৷
আনহাতে, অক্সফ’ড ভেকচিনৰ তৃতীয় পর্যায়ৰ মানৱ দেহত পৰীক্ষণ প্রায় সমাপ্তিৰ দিশে৷ উল্লেখ্য যে ছেপ্ঢেম্বৰ–ক্টোবৰৰ্ তুলনাত দেশত ক’ভিড–১৯ত আক্রান্তৰ সংখ্যা কিছু হ্রাস পালেও সংক্রমণৰ ভয়াৱহতা এতিয়াও শেষ হোৱা নাই৷ দীপাৱলীৰ পাছত দেশত ক’ভিড–১৯ত আক্রান্তৰ সংখ্যা বর্ধিত হ’বলৈ ধৰিছে৷ ইপিনে, দেশৰ ৰাজধানী দিল্লীত বিগত পষেক ধৰি প্রতিদিনে আক্রান্তৰ সংখ্যাই অনাকাংক্ষিত অভিলেখ গঢ়ি আছে৷