নিয়মীয়া বাৰ্তা, ১৮ জানুৱাৰীঃ উত্তৰ–পূব সীমান্ত ৰে’লৱেৰ নির্মাণ প্রকল্পৰ ঠিকা আবণ্টনৰ নামত কোটি টকা উৎকোচ লোৱাৰ অভিযোগত চি বি আইৰ এটা দলে ভাৰতীয় ৰে’ল অভিযান্ত্রিক সেৱাৰ (আই আৰ ই এছ) এজন জ্যেষ্ঠ বিষয়াক গ্রেপ্তাৰ কৰে৷ উত্তৰ–পূব সীমান্ত ৰে’লৱেৰ গুৱাহাটীৰ মালিগাঁওস্থিত মুখ্য কার্যালয়ত চি বি আইৰ এটা দলে অতর্কিতে অভিযান চলাই আই আৰ ই এছ বিষয়াজনক গ্রেপ্তাৰ কৰে৷ ধৃত জ্যেষ্ঠ বিষয়াজন হ’ল বিহাৰৰ মহেন্দৰ সিং চৌহান৷
চি বি আইৰ এক সূত্রই সংবাদ মাধ্যমক জনোৱা মতে, ১৯৮৫ বেটছৰ আই আৰ ই এছ বিষয়া মহেন্দৰ চৌহানে উত্তৰ–পূব সীমান্ত ৰে’লৱেৰ নির্মাণ প্রকল্পৰ ঠিকা আবণ্টন দিয়াৰ বাবদ ঠিকাদাৰৰ পৰা ১ কোটি টকা উৎকোচ লয়৷ এই সন্দর্ভত অভিযোগ লাভ কৰাৰ পাছতে চি বি আইৰ এটা দলে আজি মালিগাঁওস্থিত উত্তৰ–পূব সীমান্ত ৰে’লৱেৰ মুখ্য কার্যালয়ত অভিযান চলাই ঘোচখোৰ আই আৰ ই এছ বিষয়া মহেন্দৰ সিং চৌহানক গ্রেপ্তাৰ কৰে৷
উল্লেখ্য যে চি বি আইৰ অভিযানকাৰী দলটোৱে মহেন্দৰ সিং চৌহানে লোৱা ১ কোটি টকা উদ্ধাৰ কৰিবলৈ সক্ষম হয়৷ চি বি আইৰ দলে এই সংক্রান্তত মালিগাঁৱত থকা মহেন্দৰ সিং চৌহানৰ কার্যালয় কক্ষ, ৰে’ল বিভাগৰ আৱাসকে ধৰি দেশৰ মুঠ ২০টা স্থানত অভিযান চলায়৷