নিয়মীয়া বাৰ্তা, ২১ ফেব্ৰুৱাৰীঃ ৰাজ্য চৰকাৰৰ নির্লিপ্ততাৰ সুযোগ লৈ পুনৰ সক্রিয় হৈ উঠিছে গৰু ছিণ্ডিকেট বাহিনী৷ কিছুদিনৰ বিৰতিৰ পিছত আকৌ অসমৰ মাজেৰে বাংলাদেশলৈ আৰম্ভ হৈছে গো–মাতাৰ চোৰাং চালান৷ এইবাৰ উজনি অসমৰ শাসকীয় দলৰ দুজন বিধায়কৰ নেতৃত্বত আৰম্ভ হোৱা এই অবৈধ কাৰবাৰে এতিয়া সর্বত্র চাঞ্চল্যৰ সৃষ্টি কৰিছে৷ বিগত কেইদিনমান ধৰি প্রতিদিনে চুবুৰীয়া পশ্চিমবংগৰ সোণাপুৰ বজাৰৰ পৰা মেঘালয়ৰ ন–মাইল বজাৰলৈ ট্রাকে ট্রাকে সৰবৰাহ কৰি থকা হৈছে উত্তৰ ভাৰতৰ গৰু৷ পৰৱর্তী সময়ত জাকে জাকে গো–মাতাৰ চালান চলে বাংলাদেশলৈ৷ যিহেতু বাংলাদেশ বিশ্বৰ ভিতৰত অন্যতম বৃহৎ গো–মাংস ৰপ্তানিকাৰী দেশ, গতিকে তাত গো–মাংসৰ চাহিদাও বেছি৷ সেইবাবেই ছিণ্ডিকেট বাহিনীয়ে একোটা গৰুৰ বিপৰীতে বাংলাদেশত একৰ পৰা ডেৰ লাখ টকালৈকে দাম লাভ কৰে৷ এই ধন হাৱালাৰ মাধ্যমেৰে অসম নাইবা মেঘালয়ত সংগ্রহ কৰে গো–মাফিয়াসকলে৷ গো–মাতাৰ চোৰাং ব্যৱসায়ৰ বিৰুদ্ধে বিভিন্ন দল–সংগঠন যোৱা সময়ছোৱাত সৰৱ হৈ উঠাই নহয়, ৰাজপথত নামি অভিযানো চলাইছিল৷ জব্দ কৰিছিল ট্রাকে ট্রাকে চোৰাং গৰু৷ কিন্তু শেহতীয়াকৈ ৰাজনৈতিক পৃষ্ঠপোষকতাত চলি থকা অবৈধ কাৰবাৰক মুকলিকৈ ৰক্ষণাবেক্ষণ দিবলৈ লৈছে অসম আৰক্ষীয়ে৷ কোকৰাঝাৰৰ পৰা গুৱাহাটী মহানগৰীলৈ খোদ আৰক্ষীয়ে গৰু সৰবৰাহ কৰা ট্রাকক এছক’ট দিয়াৰ গুৰুতৰ অভিযোগ উত্থাপন হৈছে৷ এইক্ষেত্রত আৰক্ষী আৰু ছিণ্ডিকেট বাহিনীৰ মাজত ধনৰ লেনদেন কৰে মোজাম্মিল নামৰ এজন কংগ্রেছী নেতাই৷ ধর্ষণৰ গোচৰত অভিযুক্ত এইগৰাকী কংগ্রেছীক কেইদিনমান পূর্বে এজন বিজেপি বিধায়কৰ লগত চাহ খাই থকা অৱস্থাত কামৰূপৰ আৰক্ষীয়ে গ্রেপ্তাৰ কৰিছিল৷ কিন্তু ৰাজনৈতিক হেঁচাত সেই নিশাই তেওঁক থানাৰ পৰা মুকলি কৰি দিয়া হয়৷ এতিয়া উজনি অসমৰ দুই বিধায়কৰ সহযোগত এইজন মোজাম্মিলেই আৰম্ভ কৰিছে কোটিটকীয়া গৰুৰ ছিণ্ডিকেট৷ ছিণ্ডিকেট বাহিনী আৰু আৰক্ষীৰ মিতিৰালিৰ লজ্জাজনক ছবিখন কালি নিশা কোকৰাঝাৰত প্রকট হৈ পৰিল৷ কোকৰাঝাৰৰ ছেৰফাংগুৰিত যোৱানিশা এনডিএফবি সদস্যই তিনিখনকৈ গৰুভর্তি ট্রাক জব্দ কৰে৷ ডব্লিউবি ৭৬ ৮৮৭৪, এ এছ ২৬ চি ৫৪০৪ আৰু ইউপি ৪১ এটি ৫৮৮৩ নম্বৰৰ পশ্চিমবংগৰ পৰা মেঘালয় অভিমুখী ট্রাককেইখনত আছিল ৭২টা গৰু৷ আটাইকেইটা গৰু বাংলাদেশত বিক্রীৰ বাবে লৈ যোৱা হৈছিল৷ নিশা এনডিএফবি সদস্যসকলে গৰুসহ ট্রাককেইখন জব্দ কৰি থানাত চমজাই দিয়ে৷ লগতে গো–মাতাৰ চোৰাং চালানৰ বিৰুদ্ধে স্থানীয় থানাত এজাহাৰো দাখিল কৰে৷ কিন্তু অতি ৰহস্যজনকভাৱে নিশাৰ ভিতৰতে আৰক্ষীয়ে ৭২টা গৰু আৰু ট্রাক মোকলাই দিয়ে৷ ইয়াৰ পৰাই স্পষ্ট হৈ পৰে যে ৰাজনৈতিক পৃষ্ঠপোষকতা কৰা অসম আৰক্ষীৰ সহযোগত এতিয়া অসমত পূর্ণোদ্যমে চলিছে গো–মাতাৰ কোটিটকীয়া ছিণ্ডিকেট৷ গৰুক কেন্দ্র কৰি চলি থকা অবৈধ ব্যবসায় গোমৰ ফাক হৈ পৰাৰ পিছত মুখ্যমন্ত্রী সর্বানন্দ সোণোৱালে কি ব্যৱস্থা গ্রহণ কৰে, সেয়া লক্ষণীয় হ’ব৷