নিয়মীয়া বাৰ্তা, ১৫ মাৰ্চঃ বিটিচি নির্বাচনক লৈ আৰম্ভ হোৱা ব্যাপক ৰাজনৈতিক কুচকাৱাজৰ সময়তে পৰিষদীয় নির্বাচনত এককভাৱে ৪০টা সমষ্টিত প্রতিদ্বন্দ্বিতা কৰাৰ কথা ঘোষণা কৰিলে শাসকীয় বিজেপিয়ে৷ ইতিপূর্বে এককভাৱে বিটিচি নির্বাচনত অৱতীর্ণ হোৱাৰ সিদ্ধান্ত লৈছিল বিজেপিয়ে৷ এইবাৰ পৰিষদীয় নির্বাচনত আটাইকেইখন আসনতে প্রতিদ্বন্দ্বিতা কৰাৰ সিদ্ধান্তই ৰাজনৈতিক মহলত সৃষ্টি কৰিছে বিশেষ প্রতিক্রিয়া৷
মন কৰিবলগীয়া যে বি পি এফৰ সৈতে দিছপুৰত মিত্রতা বজাই ৰখা বিজেপিয়ে বিটিচি নির্বাচনত হাগ্রামা মহিলাৰীৰ সৈতে মিত্রতা অটুট ৰাখিব বুলি ধাৰণা কৰা হৈছিল৷ কিন্তু বি টি আৰ চুক্তি আৰু ইউ পি পি এলৰ উত্থানৰ পাছতে বিজেপিয়ে এককভাৱে প্রতিদ্বন্দ্বিতাত নমাৰ সিদ্ধান্ত গ্রহণ কৰে৷ দলৰ এই সিদ্ধান্তৰ কথা আজি সদৰী কৰি মন্ত্রী তথা বিটিচি নির্বাচনৰ বাবে গঠন কৰি দিয়া ক’ৰ কমিটীৰ অধ্যক্ষ ভবেশ কলিতাই উল্লেখ কৰে যে বি টি এ ডি এলেকাত বিজেপিৰ সাংগঠনিক দিশ শক্তিশালী কৰাৰ লক্ষ্যৰে এইবাৰ বিটিচি নির্বাচনত এককভাৱে প্রতিদ্বন্দ্বিতাৰ সিদ্ধান্ত লোৱা হৈছে৷ অৱশ্যে বি পি এফৰ সৈতে বিধানসভা নির্বাচনত বুজাবুজি অব্যাহত থাকিব বুলি স্পষ্ট কৰি মন্ত্রীগৰাকীয়ে ইয়াকো উল্লেখ কৰে যে বিটিচিত দলীয় শক্তি প্রতিপন্ন কৰাৰ লক্ষ্যৰে ৪০খন আসনতে বিজেপিয়ে প্রতিদ্বন্দ্বিতা কৰিব৷ বি পি এফৰ প্রসংগত মন্ত্রীগৰাকীৰ ভাষ্য– যিহেতু মিত্রতা নাই, গতিকে বি পি এফে কি ৰাজনৈতিক সিদ্ধান্ত লয় অথবা নির্বাচনত দলটোৰ ইছ্যু কি হয়, তাক লৈ বিজেপিয়ে মূৰ নঘমায়৷ দলে বি টি এ ডিত স্থাপন হোৱা শান্তিৰ বিষয়টোকে মূল ইছ্যু হিচাপে লৈ প্রতিদ্বন্দ্বিতাত নামিব৷ সমান্তৰালভাৱে বি টি এ ডিৰ সম–উন্নয়নৰ বিষয়টোও নির্বাচনী ইছ্যু হ’ব৷ মন কৰিবলগীয়া যে বিটিচি নির্বাচনত বিজেপিয়ে এককভাৱে প্রতিদ্বন্দ্বিতা কৰাৰ লক্ষ্যৰে আগতীয়াকৈ কুচকাৱাজ আৰম্ভ কৰিছে৷ এই উদ্দেশ্যে দলটোৰ কেইবাজনো মন্ত্রী, সাংসদ আৰু বিধায়কক বি টি এ ডিৰ ৪০টা সমষ্টিৰ প্রভাৰী হিচাপে নিয়োগ কৰিছে৷ দলটোৰ এই নেতাসকলে যোৱা সময়ছোৱাত ভোটাৰ তথা বিশিষ্ট নাগৰিকৰ সৈতে বার্তালাপ কৰি দলৰ বিভিন্ন সাংগঠনিক দিশৰ বুজ লৈছে৷ আজি মন্ত্রী ভবেশ কলিতাই জানিবলৈ দিয়া অনুসৰি, যোৱা কেইদিনত দলৰ প্রভাৰীসকলে নির্বাচন সন্দর্ভত সংগ্রহ কৰা বিভিন্ন দিশ তথা প্রার্থী সম্পর্কত অহা ১৬ মার্চত বিস্তৃত প্রতিবেদন দাখিল কৰিব৷ বিশেষকৈ ১৪ আৰু ১৫ মার্চত প্রতিটো সমষ্টিতে দলীয় নেতাসকলে কর্মী আৰু সমর্থকৰ সৈতে বার্তালাপ কৰি সমষ্টিটোৰ বাবে যোগ্য প্রার্থী কোন হ’ব, তাক বিচাৰি উলিয়াব৷
১৬ মার্চত প্রতিটো সমষ্টিৰ বাবে তিনিজনীয়া তালিকা দাখিল কৰিব৷ উক্ত তালিকাৰ ভিত্তিতে ১৬ মার্চৰ সন্ধিয়া দলে আনুষ্ঠানিকভাৱে প্রার্থী তালিকা প্রকাশ কৰিব৷ উল্লেখ্য যে প্রথমবাৰৰ বাবে বিটিচি নির্বাচনত অংশগ্রহণ কৰিবলৈ লোৱা বিজেপিৰ প্রার্থিত্ব বিচাৰি ইতিমধ্যে ৪০০তকৈ অধিক প্রার্থীয়ে আবেদন কৰিছে৷ প্রতিটো সমষ্টিৰ বাবে ১০জনতকৈ অধিক প্রার্থিত্বপ্রত্যাশী থকা হেতু শাসকীয় দলটোৰ নেতৃত্বই প্রার্থিত্ব প্রদানৰ বিষয়টো গুৰুত্ব সহকাৰে গ্রহণ কৰিছে৷ উল্লেখ্য যে বিটিচি নির্বাচনক লৈ কালি দলটোৰ ৰাষ্ট্রীয় সাধাৰণ সম্পাদক অজয় জামৱাল আৰু ‘নেডা’ৰ আহ্বায়ক ড০ হিমন্ত বিশ্ব শর্মাৰ উপস্থিতিত এক গুৰুত্বপূর্ণ বৈঠক অনুষ্ঠিত হৈ যায়৷ এই বৈঠকত মন্ত্রী ভবেশ কলিতা, সাংসদ দিলীপ শইকীয়া, বিধায়ক অশ্বিনী ৰায়, নাৰায়ণ ডেকা, দলৰ জ্যেষ্ঠ নেতা জয়ন্ত মল্ল বৰুৱা আদি কেইবাজনো শীর্ষ নেতা উপস্থিত থাকে৷ বৈঠকত বি টি এ ডি নির্বাচনত দলে এককভাৱে অৱতীর্ণ হ’লে কোন কোন সমষ্টিক সর্বাধিক অগ্রাধিকাৰ দিব, সেই সম্পর্কে বিস্তৃত আলোচনা হোৱাৰ লগতে নির্বাচনক লৈ এলানি ৰণকৌশলো প্রস্তুত কৰা হয়৷ বিশেষকৈ অবড়ো অধ্যুষিত সমষ্টিসমূহ বিজেপিয়ে দখল কৰাৰ বাবে এইবাৰ সর্বাধিক গুৰুত্ব দিছে৷ অবড়ো ভোট যাতে কংগ্রেছ অথবা এ আই ইউ ডি এফৰ সপক্ষে নাযায়, সেই দিশটোৰ প্রতি বিশেষ সতর্কতা অৱলম্বন কৰা বিজেপিয়ে ইয়াৰ বাবে প্রস্তুত কৰিছে বিশেষ ৰণনীতি৷ ইফালে আজি মন্ত্রী ভবেশ কলিতাই দাবী কৰে যে প্রথমবাৰৰ বাবে বিজেপিয়ে বিটিচি নির্বাচনত অৱতীর্ণ হ’লেও বৃহৎ জয়লাভৰ সম্ভাৱনা আছে৷ মন্ত্রীগৰাকীয়ে নির্বাচনত ২০টাৰো অধিক সমষ্টি দখল কৰিব বুলিও আজি দাবী কৰে৷