নিয়মীয়া বাৰ্তা, ২৮ নৱেম্বৰঃ অসমবিদ্বেষী বক্তব্যৰে বৰাকৰ বাঙালী নেতা প্রদীপ দত্ত ৰয়ে সৃষ্টি কৰা অশান্তিক লৈ আজি সৰৱ হৈ পৰিল বিশিষ্ট চিন্তাবিদ হীৰেন গোহাঁই৷ চিন্তাবিদগৰাকীৰ মন্তব্য– একাংশই বৰাক আৰু ব্রহ্মপুত্র উপত্যকাৰ মাজত এক বিভেদৰ বীজ সিঁচাৰ বাবে চেষ্টা চলাই আছে৷ এয়া কোনো নতুন কথা নহয়৷ আজি এখন সংবাদ মেল সম্বোধন কৰি প্রদীপ দত্ত ৰয়ৰ বক্তব্যক লৈ সৃষ্টি হোৱা প্রতিক্রিয়া সন্দর্ভত তেওঁ কয় যে প্রদীপ দত্ত ৰয় কোনো গুৰুত্বপূর্ণ লোক নহয়৷ তেওঁৰ মন্তব্যক লৈ প্রতিক্রিয়াৰ সৃষ্টি কৰাৰ প্রয়োজন নাই৷ শেহতীয়াকৈ অসমবিৰোধী মন্তব্য প্রকাশ কৰাৰ বাবে যি প্রতিক্রিয়াৰ সৃষ্টি হৈছে, তাৰ কোনো প্রয়োজন নাই৷ দৰাচলতে ৰাজ্যত শেহতীয়াকৈ একাংশই এনেধৰণৰ এক অৰাজকতা সৃষ্টি কৰাৰ চেষ্টা চলাই আছে৷ হিন্দু–মুছলমানৰ মাজত জাত–পাতৰ ৰাজনীতি চলিছে৷ ইয়াৰ ফলত কোনেও উপকৃত হোৱা নাই, ধর্মৰো উন্নয়ন হোৱা নাই, জাতিৰো উন্নয়ন হোৱা নাই৷ এয়া দুষ্ট শক্তিৰ পৰিকল্পিত ষড়যন্ত্র৷ এইক্ষেত্রত আমি মাৰবান্ধি থিয় দিয়া উচিত৷ ইফালে, ‘কা’ক লৈ সৰৱ হৈ বিশিষ্ট চিন্তাবিদগৰাকীয়ে কয়– শক্তিৰ জোৰেৰে ‘কা’ বলৱৎ কৰিব বিচাৰিছে৷ সদনত বিৰোধীক কথা ক’বলৈ সুবিধা দিয়া নহ’ল৷ কিন্তু ‘কা’ৰ প্রাসংগিকতা এতিয়াও শেষ হোৱা নাই আৰু নহয়৷ আমি এচামেহে ইয়াৰ প্রাসংগিকতা নাইকিয়া কৰিলোঁ৷ আইনৰ বিৰোধিতাৰে প্রথমে কিছু গৰম গৰম কথা আৰু ভাষণ দিলোঁ আৰু পিছত গৈ বিজেপিৰ গঁৰালত সোমালোঁ৷ এনেদৰে এটা আন্দোলন কেতিয়াও ফলপ্রসূ নহয়৷ যাৰ বাবে আজি ‘কা’ আন্দোলনটো নিঃশেষ হৈ গ’ল বুলি সকলোৱে অনুভৱ কৰিছে৷ এয়া পৰিতাপৰ বিষয়৷