নিয়মীয়া বাৰ্তা, ২৪ মে : ৰঙিয়া আৰক্ষীৰ জালত ড্ৰাগছ সৰবৰাহকাৰী । গোপণ সূত্ৰৰ পম খেদি ৰঙিয়া আৰক্ষীয়ে ব্ৰাউন ছুগাৰসহ আটক কৰিলে দুজন সৰবৰাহকাৰীক । আৰক্ষীৰ সূত্ৰ অনুসৰি ৰঙিয়াৰ ইক’ পাৰ্কত দুজন যুৱকে ড্ৰাগছ বিক্ৰী কৰিবলৈ আহাৰ খবৰ আৰক্ষীয়ে লাভ কৰে। ততাতৈয়াকৈ আৰক্ষীৰ এটা দলে উক্ত স্থানত অভিযান চলাই দুয়োজনকেই আটক কৰিবলৈ সক্ষম হয়। আটক হোৱা সৰবৰাহকাৰী দুজনৰ নাম মিহাইল নাৰ্জাৰী আৰু এলাৰ্ট মুছাহাৰী । দুয়োজনৰেই ঘৰ চিৰাং জিলাত বুলি জানিব পৰা গৈছে। আৰক্ষীয়ে অভিযানৰ সময়ছোৱাত দুয়োজনৰ পৰা ব্ৰাউন ছুগাৰ ভৰ্তি ১৯ টা কণ্টেইনাৰ জব্দ কৰে। ব্ৰাউন ছুগাৰ খিনিৰ মুঠ ওজন ৩০ গ্ৰাম , বৰ্তমান বজাৰ মূল্য প্ৰায় এক লাখ টকা বুলি আৰক্ষীৰ সূত্ৰত প্ৰকাশ । দুজনেই ব্ৰাউন ছুগাৰখিনি বিক্ৰী কৰিবলৈ আনিছিল বুলি ইতিমধ্যে আৰক্ষীৰ জেৰাত স্বীকাৰ কৰিছে । আৰক্ষীয়ে বৰ্তমানেও জেৰা অব্যাহত ৰাখিছে ।