নিয়মীয়া বাৰ্তা, ২৬ জুনঃ আজি পুৱা অসমৰ চুবুৰীয়া ৰাজ্য অৰুণাচল প্ৰদেশৰ চাংলাং জিলাত পুনৰ ভাৰতীয় সেনাৰ হাতত আটক হ’ব লগা হ’ল চাৰিজন আলফা স্বাধীনৰ কেডাৰ। উল্লেখ্য যে দিনজান সেনা ডিভিজনৰ চোৰাংচোৱাৰ খবৰৰ ভিত্তিত আছাম ৰাইফলছৰ ৬ আৰু ৯নং বেটেলিয়নে আলফা স্বাধীনৰ বিৰুদ্ধে চলোৱা যুটীয়া অভিযানত ম্যানমাৰৰ শিবিৰৰ পৰা পলাই অহা চাৰি দুৰ্ধৰ্ষ আলফা স্বাধীনৰ সদস্যক আজি পুৱা ৬.৩০ বজাত অস্ত্ৰসহ আটক কৰে৷
ভাৰত-ম্যানমাৰ সীমান্ত চকী পাৰ হওঁতেই অটব্য অৰণ্যৰ মাজত ভাৰতীয় সেনাৰ অভিযানকাৰী দলৰ হাতত আটক হোৱা আলফা স্বাধীনৰ সদস্যকেইজন হৈছে তিনিচুকীয়া জিলাৰ পেঙেৰী আৰক্ষী থানাৰ অন্তৰ্গত কঁঠালগুৰি গাঁও নিৱাসী ছাৰ্জেণ্ট মেজৰ টিখেশ্বৰ মৰাণ ওৰফে অৰ্জুন অসম, লখিমপুৰ জিলাৰ ঢকুৱাখনা আৰক্ষী থানাৰ অন্তৰ্গত কাঠাবাৰী গাঁও নিৱাসী ছাৰ্জেন্ট অৰূপ দুৱৰা ওৰফে আঞ্চন অসম, তিনিচুকীয়া জিলাৰ মাৰ্ঘেৰিটা আৰক্ষী থানাৰ অন্তৰ্গত খামান পথাৰ গাঁও নিৱাসী ছাৰ্জেণ্ট সুৰজিত দুৱৰা ওৰফে খামান অসম আৰু তিনিচুকীয়া জিলাৰ পেঙেৰী আৰক্ষী থানাৰ অন্তৰ্গত টেকেৰী গাঁও নিৱাসী ছাৰ্জেণ্ট জিন্তু অসম।
ধৃত আলফা সদস্যকেইজনৰ জিম্মাৰ পৰা দুটা আমেৰিকাত নিৰ্মিত পিষ্টল আৰু এটা চীনত নিৰ্মিত পিষ্টলসহ কেইবাটাও মেগজিন, সজীৱ গুলী আৰু ম’বাইল ফোন উদ্ধাৰ কৰে৷ ভাৰতীয় সেনাই ধৃত আলফা কেডাৰকেইজনক চাংলাং জিলাৰ লাজু থানাত চমজাই দিয়ে।