নিয়মীয়া বাৰ্তা, ১১ আগষ্টঃ ৰঙিয়াস্থিত বিদ্যুৎ বিভাগৰ ৭জন কর্মচাৰীক ভুৱা মেডিকেল বিল দাখিল কৰি ধন সৰকোৱাৰ চেষ্টা কৰোঁতে ধৰা পৰাত বিভাগীয় কর্তৃপক্ষই নিলম্বন কৰে৷ কর্মচাৰীকেইজনৰ বিৰুদ্ধে বিভাগটোৰ ৰঙিয়াৰ সহকাৰী মহাপ্রবন্ধক দিগন্ত ডেকাই এজাহাৰ দাখিল কৰে৷
অভিযোগ অনুসৰি একোজন কর্মচাৰীয়ে ৪ লাখ টকাৰ পৰা ১১ লাখ টকা পর্যন্ত চিকিৎসাৰ নামত ভুৱা মেডিকেল বিল দাখিল কৰি ধন আত্মসাৎ কৰাৰ চেষ্টা কৰিছিল৷ বিদ্যুৎ বিভাগৰ ৰঙিয়াস্থিত তিনিটা কার্যালয়ৰ ৭গৰাকীকৈ কর্মচাৰীয়ে এনেদৰে বক্র পথেৰে ধন সৰকাবলৈ চেষ্টা কৰোঁতে ধৰা পৰে৷ ইয়াৰ পিছতে লগে লগে ২ নং ৰঙিয়া বৈদ্যুতিক সংমণ্ডলৰ কনিষ্ঠ অভিযন্তা জ্যোতিষ ডেকা, সহকাৰী মহা প্রবন্ধকৰ কার্যালয়ৰ মুখ্য সহায়ক উমেশ দাস, ১নং ৰঙিয়া বৈদ্যুতিক সংমণ্ডলৰ সহায়ক বিশ্বজিৎ বর্মনৰ লগতে আন চাৰিজন লাইনমেনক নিলম্বন কৰে৷ পিছত উক্ত বিভাগীয় কর্তৃপক্ষই ৰঙিয়া থানাত এজাহাৰ দাখিল কৰে৷ ইতিমধ্যে আৰক্ষীয়ে উক্ত গোচৰ সন্দর্ভত তদন্ত আৰম্ভ কৰিছে৷