নিয়মীয়া বাৰ্তা, ১৭ ডিচেম্বৰঃ আঞ্চলিক দল অসম গণ পৰিষদ (অগপ)ৰ সভাপতি আৰু কার্যকৰী সভাপতি হিচাপে ক্রমে অতুল বৰা আৰু কেশৱ মহন্তক নির্বাচিত কৰা প্রক্রিয়া সোমাই পৰিছে আইনী মেৰপেঁচত৷ এই সমগ্র বিষয়টো এইবাৰ উত্থাপিত হৈছে উচ্চ ন্যায়ালয়ৰ মজিয়াত৷ আজি এই গোচৰটোৰ শুনানিৰ বাবে তালিকাভুক্ত হৈ আহে যদিও গুচৰীয়া পক্ষৰ অধিবক্তাই সময় বিচৰাত অহা ৮ জানুৱাৰীত পৰৱর্তী শুনানিৰ বাবে দিন ধার্য কৰা হয়৷
উল্লেখনীয় যে যোৱা ২৭ আগষ্টত অগপৰ কেন্দ্রীয় সাধাৰণ পৰিষদৰ বৈঠক অনুষ্ঠিত হৈছিল৷ এই বৈঠকতে অতুল বৰাক সভাপতি আৰু কেশৱ মহন্তক কার্যকৰী সভাপতি হিচাপে নির্বাচিত কৰা হৈছিল৷ কিন্তু নীতি–বহির্ভূতভাৱে এই সাধাৰণ সভা অনুষ্ঠিত কৰা বুলি নিম্ন আদালতত এটা গোচৰ ৰুজু কৰিছিল জিতেন ডেকা নামৰ এগৰাকী ব্যক্তিয়ে৷ এই গোচৰটোৰ শুনানি গ্রহণ কৰি আদালতে এদিন পূর্বে সাধাৰণ পৰিষদৰ বৈঠক অনুষ্ঠিত নকৰিবলৈ নির্দেশ দিয়ে৷ কিন্তু আদালতৰ নির্দেশ লাভ নকৰাৰ অজুহাততে সাধাৰণ পৰিষদৰ বৈঠক অনুষ্ঠিত হয়৷ যাৰ বাবে অসম গণ পৰিষদৰ নেতৃত্বৰ বিৰুদ্ধে আদালত অৱমাননা গোচৰ ৰুজু হয়৷
অৱশ্যে এই গোচৰটোত অগপ নেতৃত্বই সকাহ লাভ কৰে৷ আদালতে পূর্বে দিয়া স্থগিতাদেশ প্রত্যাহাৰ কৰে৷ কিন্তু শেহতীয়াকৈ পুনৰ নিম্ন আদালতৰ এই নির্দেশক প্রত্যাহ্বান জনাই জিতেন ডেকাই গুৱাহাটী উচ্চ ন্যায়ালয়ত ১৩০/২০২০ নং চিভিল ৰিভিজন পিটিচন দাখিল কৰে৷ এই গোচৰটোৰেই আজি শুনানিৰ বাবে তালিকাভুক্ত হৈ আহে৷ ইয়াৰ লগে লগে পুনৰ অতুল বৰা আৰু কেশৱ মহন্তৰ ভাগ্য ওলমি ৰৈছে উচ্চ ন্যায়ালয়ৰ মজিয়াত৷