নিয়মীয়া বাৰ্তা, ৩১ মে’: শুনিবলৈ আচৰিত যেন লাগিলেও লখিমপুৰত এজন যুৱকে খুচুৰা পইচাৰে ক্রয় কৰিলে এখন বাহন৷ এবস্তা–দুবস্তা নহয়, মুঠ দহ বস্তা খুচুৰা পইচা লৈ গাডী ক্রয় কৰিবলৈ আহিল এজন গ্রাহক৷ দহ বস্তা এটকীয়া, দুটকীয়া আৰু ৫ টকীয়া খুচুৰা মুদ্রা হিচাপ কৰি ভাগৰি পৰিল লখিমপুৰৰ হুণ্ডাই ডীলাৰৰ কর্মচাৰী৷ আজি সন্ধিয়াপর্যন্ত এনে পৰিৱেশ বিৰাজ কৰে লখিমপুৰ নগৰৰ হুণ্ডাই ডীলাৰত৷ ধেমাজিৰ গোগামুখৰ ৰঞ্জিত চাহু নামৰ গেলামালৰ দোকানীজনে বিগত কেইবাবছৰ ধৰি গোটাই ৰাখিছিল খুচুৰা পইচাসমূহ৷ সপোন দেখিছিল এইসমূহেৰে এখন বিলাসী বাহন ক্রয় কৰাৰ৷ অৱশেষত ৰঞ্জিতৰ সপোন বাস্তৱ হ’ল৷
আজি লখিমপুৰৰ মেনড’না হুণ্ডাই ডীলাৰত বন্ধুৰ সৈতে লৈ আহিল এইসমূহ খুচুৰা পইচাৰ বস্তা৷ ১০ বস্তাত আছে মুঠ ৯৫ হাজাৰ টকা৷ এইখিনি আগধন দি ক্রয় কৰিলে এখন গ্রেণ্ড আইটেন বাহন৷ সপোনৰ বাহনখন ক্রয় কৰি আনন্দিত ৰঞ্জিত চাহু নামৰ যুৱকজন৷ বিপৰীতে বাকী কাম বাদ দি নিশালৈকে খুচুৰা পইচাৰ হিচাপত ব্যস্ত থাকিবলগীয়া হ’ল ডীলাৰৰ ১০–১২জন কর্মচাৰী৷ খুচুৰা পইচাৰে বাহন ক্রয়ৰ এই আজব ঘটনাই ৰাইজক বেছ আমোদ দিয়ে৷