নিয়মীয়া বাৰ্তা,৮ মাৰ্চঃ কামৰূপ জিলাৰ ছয়গাঁও আৰক্ষী থানাৰ অন্তৰ্গত বামুণীগাঁৱত যোৱা নিশা ছয়গাঁও আৰক্ষীয়ে এখন চোৰাং গৰু ভৰ্তী ট্ৰাকসহ দুজন লোকক আটক কৰিবলৈ সক্ষম হয় । ঘটনাৰ বিৱৰণীত জানিব পৰা মতে, কামৰূপ জিলাৰ ছয়গাঁও আৰক্ষী থানাৰ ভাৰপ্ৰাপ্ত আৰক্ষী বিষয়া কপিল পাঠকে এক গোপন খবৰৰ ভিত্তিত যোৱা নিশা প্ৰায় ১১ বজাত চোৰাং গৰুৰ বিৰুদ্ধে অভিযান চলাই বকো দিশৰ পৰা আহি থকা অৱস্থাত বামুণীগাঁও ঔগুৰি পথত ২২ টা চোৰাং গৰুসহ এখন ১১০৯ ট্ৰাক আৰু দুজন লোকক আটক কৰিবলৈ সক্ষম হয় । ছয়গাঁও আৰক্ষীয়ে আটক কৰা লোক দুজন হল বকো আৰক্ষী থানাৰ অন্তৰ্গত কালাতলী পথাৰৰ আজিজুৰ হক আৰু ছয়গাঁও আৰক্ষী থানাৰ অন্তৰ্গত মহাবিৰ পথাৰৰ ছাহানুৰ আলম । আনহাতে, আৰক্ষীয়ে জব্দ কৰা ট্ৰাকখনৰ নম্বৰ হল এ এছ ০১ জি চি ৯১৫৬ । আৰক্ষীয়ে চোৰ কেইজনৰ বিৰুদ্ধে ২৫৪/২১ নম্বৰত গোচৰ ৰুজু কৰি তদন্ত অব্যাহত ৰাখিছে ।