জনজাতীয় পোচাকক বিকৃতকৰণেৰে কৃষ্টিক অপমান নকৰিবলৈ আহ্বান; অন্যথা আইনী ব্যৱস্থা গ্ৰহণৰ বাবে প্ৰস্তুত চিংফৌ সংগঠন

নিয়মীয়া বাৰ্তা, ১৯ আগষ্টঃ চিংফৌ তথা অসমৰ খিলঞ্জীয়া জাতি-জনগোষ্ঠীৰ পৰম্পৰাগত পোচাকক আধুনিক ৰূপ দি বিকৃতকৰণেৰে জাতীয় কৃষ্টিক অপমানিত কৰা কাৰ্যক তীব্ৰ ভাষাৰে গৰিহনা দিছে সদৌ চিংফৌ ছাত্ৰ সন্থা আৰু চিংফৌ জাতীয় পৰিষদে।

সদৌ চিংফৌ ছাত্ৰ সন্থাৰ কেন্দ্ৰীয় সভাপতি নং পিয়ন গুমগী স্বাক্ষৰিত এক প্ৰেছ বিজ্ঞপ্তিত কোৱা হৈছে যে অসমৰ কেতবোৰ পাবত গজা কষ্টিউম ডিজাইনাৰ (বিশেষকৈ মাৰ্ঘেৰিটাৰ)- এ কাণ্ডজ্ঞানহীনভাৱে জনজাতীয় পোচাকসমূহক আধুনিক ৰূপ দি দৰাচলতে সংশ্লিষ্ট জনগোষ্ঠীক অপমানিত কৰিছে। সংগঠনটোৰ মতে যুগৰ আহ্বান অনুসৰি কৃষ্টি- সংস্কৃতিৰ পৰিৱৰ্তন কিম্বা আধুনিকীকৰণ নুই কৰিব নোৱাৰি। একেদৰে, কষ্টিউম ডিজাইনাৰ সকলৰ কামেই ব্যতিক্ৰমধৰ্মী নিত্য- নতুন আৰ্হিৰে পোচাক তৈয়াৰ কৰি ক্ৰেতা সৃষ্টিৰে বজাৰ দখল কৰা। সেয়া আদৰণীয়ও। কিন্তু চিংফৌসকলৰ অতিকৈ আদৰণীয় মূৰৰ পাগুৰি (জাতৱ ফাম্বাম) নি যদি মেখেলা আৰু চাদৰত স্থান দিয়া হয়, সেয়া কেতিয়াও গ্ৰহণযোগ্য নহয়।

এয়া মাথোঁ এটা উদাহৰণহে। ডিজাইনাৰসকলে জনা উচিৎ যে কোনো এটা জাতি- জনজাতিৰ পৰম্পৰাগত পোচাকৰ আধুনিক ৰূপ দিবলৈ যাওঁ‌তে সংশ্লিষ্ট জাতি বা জনজাতিটোৰ অভিজ্ঞ ব্যক্তিৰে আলাপ- আলোচনাৰ মাধ্যমত দিহা- পৰামৰ্শ লোৱা উচিৎ। পাগুৰি মেখেলাত ব্যৱহাৰ কৰাৰ দৰেই মুগা মেখেলাৰ ফুল বিহুৱাই পৰিধান কৰা কামিজত ব্যৱহাৰ কৰাটোও দোষণীয়। এনে কাৰ্যৰে জড়িত ডিজাইনাৰসকলক ভৱিষ্যতে কোনো জাতি- জনগোষ্ঠীৰ কৃষ্টি- সংস্কৃতি কিম্বা পৰম্পৰাত আঘাত হানিব পৰা কৰ্মৰ পৰা আঁ‌তৰি থাকিবলৈ আহ্বান জনাই ইয়াৰ অন্যথা হ’লে আইনী ব্যৱস্থা গ্ৰহণ কৰিবলৈকো বাধ্য হ’ব বুলি সকীয়নি দিছে।