নিয়মীয়া বাৰ্তা, ১৪ নৱেম্বৰঃ আজি সমগ্ৰ ভাৰতৰ লগতে ৰাজ্যৰ প্ৰতিখন বিদ্যালয় মহাবিদ্যালয়ে শিশু দিৱস উদযাপন কৰাৰ দৰে ডিব্ৰুগড়ৰ লাহোৱালৰ বিভিন্ন বিদ্যালয়তো উলহ মালহৰে শিশু দিৱস উদযাপন কৰা হয় ৷ শিশু সকলৰ এই পবিত্ৰ দিনটোতে শিশুসকলৰ মাজত থাকি ভাল পোৱা লাহোৱাল থানাৰ ভাৰপ্ৰাপ্ত আৰক্ষী বিষয়া মনোজ্বল গগৈক দেখা পোৱা গ’ল এক ব্যতিক্ৰম ৰূপত৷ হাতত পুৱাই একোটাকৈ চকলেটৰ টেমা লৈ বিদ্যালয়ে বিদ্যালয়ে কণ কণ ছাত্ৰ-ছাত্ৰীসকলৰ মাজত চকলেট বিতৰণ কৰি ছাত্ৰ -ছাত্ৰীসকলৰ স’তে মত বিনিময়ৰ মাজেৰে শিশুসকলক শৈক্ষিক ভবিষ্যত উজলাই তুলিবলৈ অনুপ্ৰেৰণা দিলে৷ নিষ্পাপ শিশুসকলেও আৰক্ষী বিষয়াজনক ওপচাই দিয়া মৰমে আৰক্ষী বিষয়াজনক আবেগিক কৰি তোলে । আৰক্ষী বিষয়াজনে শিশু দিৱসৰ দিনা গ্ৰহণ কৰা এই পদক্ষেপক বিদ্যালয়ৰ শিক্ষক শিক্ষয়িত্ৰী সকলৰ লগতে ছাত্ৰ -ছাত্ৰীসকলৰ অভিভাৱক আৰু লাহোৱালৰ বৌদ্ধিক সমাজখনৰ লোকসকলেও একমুখে শলাগ লৈছে।
প্ৰেৰক কাঞ্চনজ্যোতি গোহাঁই