নিয়মীয়া বাৰ্তা ১৪ ডিচেম্বৰঃ অহা ১৭ ডিচেম্বৰত অনুষ্ঠিত হ’বলগীয়া তিৱা স্বায়ত্তশাসিত পৰিসদৰ নির্বাচনৰ বাবে ককালত টঙালি বান্ধিছে বিজেপি, কংগ্রেছ, অগপ, তিৱা জাতীয় ঐক্য মঞ্চ, আপ প্রমুখ্যে প্রায়কেইটা ৰাজনৈতিক দলে৷ কিন্তু প্রচাৰৰ ক্ষেত্রত সকলোতকৈ আগত আছে ভাৰতীয় জনতা পার্টী৷ মধ্য অসমত নির্বাচনী প্রচাৰত নেতৃত্ব লৈছে ৰাজ্যিক স্বাস্থ্যমন্ত্রী পীয়ূষ হাজৰিকা আৰু মৰিগাঁও সমষ্টিৰ বিধায়ক ৰমাকান্ত দেউৰীয়ে৷ আজি মৰিগাঁৱৰ তেতেলিয়া, ঢেঁকিফলাত অভিনেত্রী আইমী বৰুৱাই বিজেপি প্রার্থী খগেন বৰদলৈৰ হৈ প্রচাৰ চলায়৷ অভিনেত্রীগৰাকীৰে ৰাইজে ছেলফি উঠিবলৈ হেতা–ওপৰা লগোৱা পৰিলক্ষিত হয়৷ সাংসদ ভুবনেশ্বৰ কলিতাই প্রচাৰ অভিযানত ভাগ লয়৷ আনহাতে বিধায়িকা আঙুৰলতাই ভূৰবন্ধা, চলমাৰি, চহৰিত নির্বাচনী প্রচাৰত অংশগ্রহণ কৰে৷