নিয়মীয়া বাৰ্তা, ১৮ ছেপ্টেম্বৰঃ ব্ৰহ্মপুত্ৰৰ জলপৃষ্ঠ ক্ৰমাৎ হ্ৰাস হৈ আহিছে যদিও গৰাখহনীয়াই ভয়ংকৰ ৰূপ লৈছে গোৱালপাৰা জিলাৰ জলেশ্বৰৰ টাকিমাৰী অঞ্চলত ৷ বিগত কেইবাবছৰ ধৰি ব্রহ্মপুত্ৰ নদীৰ গৰাখহনীয়াই অমানিশা কঢ়িয়াই আনিছে নৈপৰীয়া ৰাইজলৈ। বৰলুইতৰ তাণ্ডৱত ইতিমধ্যে বিগত এটা পষেকত প্ৰায় শতাধিক পৰিয়াল গৃহহাৰা হৈছে।
নিশ্চিহ্ন হৈছে বিদ্যালয়, ৰাজহুৱা অনুষ্ঠান-প্ৰতিষ্ঠানকে ধৰি কুৰিখনতকৈ অধিক গাঁও ৷ লক্ষীপুৰ ৰাজহ চক্ৰৰ অন্তৰ্গত অঞ্চলটোত ব্ৰহ্মপুত্ৰৰ গৰাখহনীয়াই পৰিয়ালসমূহৰ নিদ্ৰাহৰণ কৰিছে । দৈনিক স্থানান্তৰ হ’ব লগা হৈছে দুৰ্ভগীয়া পৰিয়ালৰ ঘৰ-দুৱাৰ। নিশ্চিহ্ন হৈছে বিদ্যালয়, ৰাজহুৱা অনুষ্ঠান-প্ৰতিষ্ঠান আদি।
দিনে-নিশাই ব্ৰহ্মপুত্ৰৰ বুকুত বিলীন হ’ব ধৰিছে শ শ পৰিয়ালৰ ঘৰ-দুৱাৰৰ লগতে হেক্টৰে হেক্টৰে কৃষি ভূমি। ভয়ংকৰ গৰাখহনীয়াত সৰ্বস্ব হেৰুৱাই মূৰে-কপালে হাত দিছে অঞ্চলটোৰ হাজাৰ হাজাৰ লোক। ইতিমধ্যে লুইতৰ বুকুত কুৰিখনতকৈ অধিক গাঁও জাহ গৈছে ৷