নিয়মীয়া বাৰ্তা, ২৬ মার্চঃ এক লাখ যুৱক–যুৱতীক চৰকাৰী চাকৰি প্রদানৰ প্রতিশ্রুতি পূৰণৰ ক্ষেত্রত মুখ্যমন্ত্রী ড০ হিমন্ত বিশ্ব শর্মা নেতৃত্বাধীন ৰাজ্য চৰকাৰখনে বৃহৎ পদক্ষেপ গ্রহণ কৰিছে৷ ৰাজ্যৰ নিবনুৱা যুৱক–যুৱতীসকলল্ সুখবৰ কঢ়িয়াই অসম চৰকাৰে তৃতীয় আৰু চতুর্থবর্গৰ ২৬,৪৪১টা পদৰ বাবে বিজ্ঞাপন প্রকাশ কৰিলে৷ দুটাকৈ বিজ্ঞাপনৰ জৰিয়তে পূৰণ কৰিবলৈ বিচৰা ২৬,৪৪১টা পদৰ ভিতৰত তৃতীয়বর্গৰ মুঠ পদৰ সংখ্যা ১৩,১৪১টা আৰু চতুর্থবর্গৰ পদৰ সংখ্যা হৈছে ১৩,৩০০টা৷ বিজ্ঞাপন অনুসৰি ১১ এপ্রিলৰ পৰা অনলাইনৰ জৰিয়তে আবেদনকাৰীয়ে আবেদন কৰিব পাৰিব আৰু আবেদনৰ অন্তিম দিন ৩০ মে’৷ তৃতীয়বর্গৰ একাউণ্টেণ্ট, কেচিয়াৰ, জুনিয়ৰ এছিছটেণ্ট, এল ডি এ আৰু ষ্টেন’গ্রাফাৰৰ মুঠ পদৰ সংখ্যা ৮,৩৩১টা৷ ইয়াৰ বাবে প্রার্থী স্নাতক ডিগ্রীধাৰী হোৱাৰ লগতে কমেও ৬ মাহৰ কম্পিউটাৰ চার্টিফিকেট থাকিব লাগিব৷ ফিল্ড এছিছটেণ্ট, ফিল্ডমেন, ফৰমেন, ছেকচন এছিছটেণ্ট, ছইল কনজাৰভেচন, ফিল্ড ৱর্কাৰ, জুনিয়ৰ এগ্রিকালচাৰ এক্সটেনচন অফিচাৰৰ মুঠ পদৰ সংখ্যা ৩,৬৯০টা৷ আনহাতে ড্রাইভাৰৰ মুঠ পদৰ সংখ্যা ১,১২০টা৷