নিয়মীয়া বাৰ্তা, ৮ মাৰ্চ: জাগীৰোড সমষ্টিৰ বিজেপি প্রার্থী পীয়ূষ হাজৰিকাক লৈ দেওবাৰে দলীয় সমর্থকসকলে এটা বিশাল ৰেলীৰে সমষ্টিটোত শক্তি প্রদর্শন কৰে৷ টোপাতলীৰ পৰা আঁহতগুৰিলৈ ৩৭নং ৰাষ্ট্রীয় পথেৰে উলিওৱা সমদলত কেইবাশ বাইক আৰু বাহনেৰে সমদল কৰি সমর্থকসকল আগুৱাই যোৱাৰ সময়ত পথৰ কাষত সমৱেত হৈ থকা অলেখ সমর্থকে হাজৰিকাক উষ্ম আদৰণি জনায়৷
বিজেপি প্রার্থীগৰাকীৰ সমর্থনত আৰু দলৰ হৈ শ্লোগান দিয়াৰ লগতে বিজেপি দলৰ র্ন্বিাচনী গীত পৰিৱেশন কৰে৷ সমদলত গায়ন–বায়নৰ লগতে বিভিন্ন জনগোষ্ঠীয় নৃত্য–গীতৰ শিল্পীয়েও অংশগ্রহণ কৰে৷ সমদলৰ অন্তত জাগীৰোডত সমষ্টিটোৰ মুখ্য নিৰ্বাচনী কার্যালয়টো মন্ত্রী পীয়ূষ হাজৰিকাই উদ্বোধন কৰে৷ তাৰ পিছতে সংবাদ মাধ্যমৰ আগত তেওঁ কয় যে অসমৰ দহটা সমষ্টিৰ ভিতৰলৈ জাগীৰোডক উন্নয়নেৰে উন্নীত কৰাৰ যি সপোন আছিল তাত সফল হৈছোঁ৷ ৰাইজৰ আর্শীবাদত মোৰ জয়ত কোনো সমস্যা নহয়৷ অসম বিজেপি মিত্রজোঁটে ১০০ৰ অধিক আসন লাভ কৰিব৷ এয়া আৰম্ভণিহে বিজেপি দলে ইয়াতকৈ বৃহৎ সমাৱেশ কৰিব৷
বিৰোধীক কোনো সমালোচনা নকৰাকৈ হাজৰিকাই কয় যে বিজেপি চৰকাৰে কৰা উন্নয়নৰ লগতে ৰাইজক দিয়া প্রতিশ্রুতি পালনত সফল হোৱাৰ বাবেই অসমৰ ৰাইজ বিজেপিৰ পক্ষত৷ সমদলত বিজেপি প্রার্থী হাজৰিকাৰ লগতে বিজেপি নেতা ৰাতুল শর্মা, অজয় সিঙকে ধৰি বহুসংখ্যক নেতাই অংশগ্রহণ কৰে৷