নিয়মীয়া বাৰ্তা, ২০ এপ্ৰিলঃ ৰাজ্য চৰকাৰৰ শিক্ষা বিভাগৰ নির্দেশনা অনুসৰি সোমবাৰৰে পৰা ১১খন জিলাত প্রাথমিক বিদ্যালয় অহা ৮ মে’ পর্যন্ত বন্ধ ৰখা হয়৷ এই জিলাকেইখন হ’ল– কামৰূপ (ম), কামৰূপ, নগাঁও, শোণিতপুৰ, যোৰহাট, ডিব্রুগড়, তিনিচুকীয়া, কাছাৰ আৰু বৰপেটা৷
উল্লেখ্য যে শিক্ষা বিভাগৰ আয়ুক্ত সচিব প্রীতম শইকীয়াই প্রাথমিক বিদ্যালয় বন্ধ কৰা সন্দর্ভত কালি আনুষ্ঠানিকভাৱে নির্দেশনা জাৰি কৰিছিল৷ জাননীখনত কোৱা হৈছিল যে ৰাজ্যৰ যিকেইখন জিলাত ক’ৰোনা ভাইৰাছত আক্রান্ত লোকৰ সংখ্যা ১০০ৰ ঘৰ অতিক্রম কৰিছে, সেই জিলাসমূহত প্রথমৰ পৰা পঞ্চম শ্রেণীপর্যন্ত প্রাথমিক বিদ্যালয়সমূহ ৮ মে’পর্যন্ত বন্ধ থাকিব আৰু ৮ মে’ত পৰৱর্তী নির্দেশনা প্রকাশ কৰা হ’ব৷
আনহাতে, যিসমূহ জিলাত ক’ৰোনা ভাইৰাছত আক্রান্ত লোকৰ সংখ্যা ১০০ৰ তলত আছে, সেই জিলাসমূহত পূর্বৰ দৰেই পাঠদান অব্যাহত থাকিব৷
উল্লেখ্য যে ক্রমাৎ স্পর্শকাতৰ হৈ পৰা ক’ভিডৰ সংক্রমণ প্রতিৰোধৰ উদ্দেশ্যে শিক্ষা বিভাগে শনিবাৰে জাৰি কৰা জাননীখনত বৰপেটাক বাদ দি প্রথম পর্যায়ত ৮খন জিলাত বিদ্যালয় বন্ধৰ ঘোষণা কৰিছিল৷ কিন্তু বৰপেটা জিলাতো ক’ৰোনা ভাইৰাছত আক্রান্ত লোকৰ সংখ্যাই শতকৰ ঘৰ অতিক্রম কৰাত কালি এই জিলাখনত থকা প্রাথমিক বিদ্যালয়সমূহ বন্ধ ৰখা হয়৷
ইফালে, বৰপেটাৰ পাছত কালি বঙাইগাঁও আৰু হোজাই জিলাতো ক’ৰোনা ভাইৰাছৰ আক্রান্ত লোকৰ সংখ্যা শতকৰ ঘৰ অতিক্রম কৰে৷ বঙাইগাঁৱত ১০৯জন আৰু হোজাইত ১০৭জন লোক ক’ৰোনা ভাইৰাছত আক্রান্ত হোৱাৰ তথ্য পোৱা গৈছে৷ এনে পৰিস্থিতিত বঙাইগাঁৱত জিলা প্রশাসনে ইতিমধ্যে প্রাথমিক বিদ্যালয় বন্ধ ৰখাৰ নির্দেশ দিছে৷
আন জিলাত ক’ৰোনা ভাইৰাছত আক্রান্ত লোকৰ সংখ্যাই শতকৰ ঘৰ অতিক্রম কৰাৰ লগে লগে তাতো এই নির্দেশনা প্রযোজ্য হ’ব৷
উল্লেখ্য যে এখন জিলাত ৩০০তকৈ অধিক লোক ক’ৰোনা ভাইৰাছত আক্রান্ত হ’লে তেনে জিলাত বিহু অনুষ্ঠান বন্ধ ৰাখিবলৈ প্রশাসনে নির্দেশ দিছিল৷ সেই মর্মে ৩০০তকৈ অধিক লোক ক’ৰোনা ভাইৰাছত আক্রান্ত হোৱাত কামৰূপ আৰু ডিব্রুগড় জিলাত বিহুৰ অনুষ্ঠান বাতিল কৰা হয়৷