নিয়মীয়া বাৰ্তা সোণাৰি চাপৰি, ঘিলামৰা, ২৫ ডিচেম্বৰঃ ঢকুৱাখনা জিলা ক্ৰীড়া সন্থাৰ উদ্যোগত আৰু ঘিলামৰা ক্ৰীড়া সন্থাৰ সহযোগত চলি থকা ২৪ সংখ্যক জেএছবি সোৱৰণী অসম ক্লাৱ ফুটবল প্ৰতিযোগিতাৰ আজি চুড়ান্ত খেলত ডিব্ৰুগড় বেক আপ বয়জ ফুটবল ক্লাবে চিৰাং ফুটবল ক্লাৱৰ ১-০ গলত পৰাস্ত কৰি চুড়ান্ত বিজয়ী সন্মান লাভ কৰিবলৈ সক্ষম হয়৷ ঘিলামৰা উচ্চতৰ মাধ্যমিক বিদ্যালয়ৰ খেলপথাৰত ১৭ ডিচেম্বৰৰ পৰা অনুষ্ঠিত হৈ থকা ২৪ সংখ্যক জে এচ বি সোঁৱৰণী অসম ক্লাব চেম্পিয়নশ্বিপ ২০২২-২৩ ফুটবল খেল প্ৰতিযোগিতাখনত ঢকুৱাখনা, ধেমাজী, মাজুলী, নলবাৰী আদি বিভিন্ন জিলাৰ ২০টাকৈ ফুটবল দলে অংশ গ্ৰহণ কৰে ৷ আজি অনুষ্ঠিত চুড়ান্ত খেলৰ বঁটা বিতৰণী সভাত উপস্থিত থাকে অসম ফুটবল ক্লাবৰ সভাপতি তথা ঢকুৱাখনাৰ বিধায়ক নব কুমাৰ দলে, ঢকুৱাখনা মহকুমাৰ মহকুমাধিপতি অৰিন্দম বৰুৱা, লখিমপুৰ জিলা পৰিষদৰ সভানেত্ৰী মঞ্জু বৰগোহাঁইৰ লগতে ঢকুৱাখনা জিলা আৰু ঘিলামৰা ক্ৰীড়া সন্থাৰ বিষয়ববীয়াসকলৰ লগতে দুই হাজাৰৰো অধিক ক্ৰীড়াপ্ৰেমী ৰাইজ উপস্থিত থাকে ৷
প্ৰেৰক ৰাজেশ বুঢ়াগোহাঞি-উত্তম কুমাৰ হাজৰিকা