নিয়মীয়া বাৰ্তা, ৬ ফেব্ৰুৱাৰীঃ চলিত মাহৰ ২৫,২৬ আৰু ২৭ তাৰিখে কাৰ্বি আংলং জিলাৰ লাংহিনত অনুষ্ঠিত হব লগা সংযুক্ত বড়ো গণ মঞ্চ চমুকৈ ইউবিপিঅৰ অষ্টম বাৰ্ষিক বছৰেকীয়া অধিৱেশনৰ আজি লাইখুঁটা স্থাপন কৰা হয়।
লাংহিনৰ পামগাঁও উচ্চতৰ মাধ্যমিক বিদ্যালয় প্ৰাঙ্গণত বৰ্ণাঢ্য আৰু বিস্তৃ কাৰ্য্যসূচীৰে তিনিদিনীয়াকৈ অনুষ্ঠিত কৰা ইউবিপিঅৰ নিৰ্ধাৰিত অধিৱেশনৰ লাইখুঁটা স্থাপন কৰে কাৰ্বি আংলং স্বায়ত্তশাসিত পৰিষদৰ মুখ্য কাৰ্য্যবাহী সদস্য তুলিৰাম ৰংহাঙে। লাইখুঁটা স্থাপন কৰি দিয়া চমু ভাষণত কেএচিৰ প্ৰধানগৰাকীয়ে কয়- ইউবিপিঅৰ আগন্তুক বছৰেকীয়া অধিৱেশনখন সকলো প্ৰকাৰৰ সফলতাৰ বাবে কাৰ্বি আংলং স্বায়ত্তশাসিত পৰিষদে যৎপৰোনাস্তি সহায়-সহযোগিতা আগবঢ়োৱাৰ কথা উল্লেখ কৰি লাংহিনৰ বাহিৰেও কাৰ্বি আংলঙৰ সকলো জাতি-জনগোষ্ঠীক সহায়-সহযোগিতা আগবঢ়াবলৈ আহ্বান জনায়।
ইউবিপিঅৰ সাধাৰণ সম্পাদক পিতাম্বৰ ব্ৰহ্মই আঁত ধৰা আৰু বাথৌ ধৰ্মীয় মাঙ্গলিক কাৰ্য্যসূচীৰে অনুষ্ঠিত কৰা লাইখুঁটা স্থাপন অনুষ্ঠানত ইউবিপিঅৰ সভাপতি মনোৰঞ্জন বসুমতাৰী, অধ্যক্ষ বাদল মুছাহাৰী, কাৰ্বি আংলং স্বায়ত্তশাসিত পৰিষদৰ ইএম তৰেন্দ্ৰ ব্ৰহ্ম,বিকেডব্লিউএচিৰ অধ্যক্ষ গাম্বাৰু মুছাহাৰী,ইএম অনিল বসুমতাৰী, অভ্যৰ্থনা সমিতিৰ সম্পাদক শান্তনু বসুমতাৰী, কাৰ্বি আংলং স্বায়ত্তশাসিত পৰিষদৰ অৰ্থনৈতিক আৰু প্ৰশাসনিক সংস্কাৰ সমিতিৰ সভাপতি উত্তম চন্দ্ৰ ব্ৰহ্ম,কাৰ্বি আংলং জিলা কছাৰী সমাজৰ সভাপতি দালসিং বসুমতাৰী, বড়ো সাহিত্য সভাৰ কাৰ্বি আংলং জিলা সমিতিৰ সভাপতি শান্তিৰাম বসুমতাৰী, কাৰ্বি আংলং জিলা আবৌফৰ সভানেত্ৰী লীলা দৈমাৰী,কাৰ্বি আংলং জিলা এবছুৰ উপ সভাপতি কল্যাণ ৰাভা,কাৰ্বি আংলং জিলা বড়ো কৰ্মচাৰী সন্থাৰ সভাপতি গোবিন্দ বসুমতাৰী, কাৰ্বি আংলং জিলা বড়ো গাওঁবুঢ়া সন্থাৰ সভাপতি মুনিন্দ্ৰ নাৰ্জাৰী,কাৰ্বি আংলং জিলা বড়ো প্ৰাইমেৰী শিক্ষক সন্থাৰ সভাপতি অজেশ্বৰ বসুমতাৰী প্ৰমুখ্যে ইউবিপিঅৰ কাৰ্বি আংলং জিলা সমিতিৰ কেবাজনো নেতা উপস্থিত থাকে।