লক্ষ্যধৰ চৌধুৰীৰ বিষয়ে ভূপেন দাই কোৱা কথাকেইষাৰ…

নিয়মীয়া বাৰ্তা, ১৮ আগষ্টঃ আজি লক্ষ্যধৰ চৌধুৰীৰ মৃত্যু তিথি। আজিৰ এই দিনটো কিতাপৰ দিন হিচাপে অসমবাসীয়ে উদযাপন কৰি আহিছে। তেখেতে জীৱিত কালত সদায়ে ন-লেখকসকলক উদগনি দিছিল। আজিৰ এই দিনটোত আহক জানো তেওঁৰ বিষয়ে ভূপেনদাই কৈ যোৱা সোণসেৰীয়া কথাকেইষাৰ …

   “লক্ষ্য দাৰ কথা সুঁৱৰিলেই মোৰ মনত পৰে শৈশৱলে’ । লক্ষ্য দা এতিয়া অনুপ্ৰেৰণা । শৈশৱত মোক চাইকেলত তুলি গান গাবলৈ নিয়া দিনবোৰৰ কথা মনত পৰে । লক্ষ্য দাই সঁচাকৈয়ে মোক মৰম কৰিছিল । মোৰ মনত আছে লক্ষ্য দাই এবাৰ চাইকেলত তুলি ভৰলুমুখৰ পৰা লৈ গৈছিল । আমি গৈছিলোঁ জজ ফিল্ডত হোৱা বনগীতৰ প্ৰতিযোগিতালে’ । যাওঁতে তেওঁ মোক জোকাই গৈছিল, জানিছানে নাই, তুমি কাৰ চাইকেলত উঠিছা ? সেইকাৰণে অন্ততঃ প্ৰতিযোগিতাত তুমি প্ৰথম হ’বয়ে লাগিব । লক্ষ্য দাৰ চাইকেলত উঠি মোৰ বাট সুগম হ’ল । মই প্ৰতিযোগিতাত প্ৰথম হ’লোঁ । লক্ষ্য দাৰ বাবে কিন্তু গোটেই শতিকাটোৱে সুগম হৈ থাকিল । তেওঁ জীৱনৰ প্ৰতিটো প্ৰতিযোগিতাতে জিকিল । এক দৃষ্টিত গোটেই শতিকাটোৱে তুলি ধৰিলে লক্ষ্য দাই । কটন কলেজিয়েট স্কুলত পঢ়োঁতে লক্ষ্য দাই একলব্য নামৰ নাটক এখন লিখিছিল । তাত মই এটা বেয়া ল’ৰাৰ ভাও দিছিলোঁ । কিন্তু বৰ মন আছিল একলব্যৰ ভাও দিবলৈ । সেই কথা জানি লক্ষ্য দাই মোক বৰকৈ জোকাইছিল । এই যে তাহানিতেই আমাৰ সান্নিধ্য হ’ল সেয়া গোটেই জীৱন থাকি গ’ল । এইদৰে মোক লক্ষ্য দাই বিভিন্ন সময়ত উৎসাহ দিছে । আশীৰ্বাদ দিছে । কেৱল মোকে নহয়, ৰাজ্যৰ অজস্ৰ মানুহক সাহস দিছে । ৰাজনীতি কৰিও নিকা জীৱন যাপনৰ এক উদাহৰণ দি গৈছে । সাধাৰণ মানুহৰ জীৱনক লৈ অসাধাৰণ সাহিত্য ৰচনা কৰি গৈছে । লক্ষ্য দা এক সম্পূৰ্ণ মানুহৰ উদাহৰণ ।”