ড০ পার্থসাৰথি মহন্ত
বিশ্বৰ সবাতোকৈ ধনাঢ্য ব্যক্তি ইলন মাস্ক আৰু ইটালীৰ প্রধানমন্ত্রী জর্জিয়া মেল’নি অলপতে মিলিত হৈছিল আটলাণ্টিক কাউঞ্চিল গ্ল’বেল চিটিজেন এৱার্ড অনুষ্ঠানত–নিউয়র্কত৷ অনুষ্ঠানৰ পাছত আছিল ডিনাৰ৷ একেখন টেবুলত ওচৰা–উচৰিকৈ আসন মাস্ক আৰু মেল’নিৰ৷ স্বাভাৱিকতেই কথা–বতৰা হ’ল৷ কথা পাতিলে মানুহে চকুত চকু থৈয়ে পাতে৷ তেনে মুহূর্ত বন্দী হ’ল ফটোত৷ হুলস্থূল লাগি গ’ল ছপা, বৈদ্যুতিন আৰু সামাজিক মাধ্যমত৷ গোটেই পৃথিৱীত৷ ডেটিং নেকি? এফেয়াৰ নেকি? কি চলি আছে? কিবা আছে নে নাই কোনেও নাজানে, হাহাকাৰ কিন্তু লাগি গ’ল৷ আনৰ ৰোমাণ্টিক সম্পর্কৰ প্রতি আমি ভীষণ উৎসুক৷ নিষিদ্ধ মানেই কৌতূহল৷ প্রেমৰ সম্পর্কৰ ক্ষেত্রত সাংঘাতিক বেছি৷ চেলিব্রিটী হ’লেতো কথাই নাই৷ অলপ নাম থকা মানুহৰ প্রতি আমি এনেয়ো আগ্রহী৷ যিমানেই বিখ্যাত আৰু গ্লেমাৰাছ হ’ব সিমানেই আগ্রহ বাঢ়িব৷ চিনেমাৰ তাৰকাৰ পৰা ৰাজনৈতিক ব্যক্তিলৈকে ৰাজহুৱা ব্যক্তিৰ ৰোমাণ্টিক সম্পর্কৰ প্রতি মানুহৰ আকর্ষণ চিৰস্থায়ী৷ মানে আনৰ প্রেমক আমি ভীষণ গুৰুত্ব দিওঁ৷ কিছু সঁচা, কিছু মিছা, কিছু উৰাবাতৰি, জল্পনা–কল্পনা, মছলাযুক্ত এই কাহিনীবোৰ আমাৰ কাৰণে অপ্রতিৰোধ্য৷
কিয়?
সংবাদ মাধ্যমত চেলিব্রিটীৰ প্রেমৰ চিত্রণে বিলাসিতা, সৌন্দর্য আৰু জীৱনতকৈ ডাঙৰ এক প্রলোভনমূলক বিকল্প বাস্তৱৰ সৃষ্টি কৰে৷ এই কাহিনীবোৰে মানুহক এখন কল্পনাৰ জগতলৈ লৈ যায়, এনে এখন জগত য’ৰ ৰোমাঞ্চ তেওঁলোকৰ নিজৰ জীৱনতকৈ অধিক যাদুকৰী৷ অর্থাৎ এয়া হৈ পৰে তেওঁলোকৰ নিজৰ দৈনিন্দিন জীৱনৰ লৌকিকতাৰ পৰা হাত সৰাৰ উপায়৷ পলায়নবাদ৷ এঞ্জেলিনা জলী আৰু ব্রেড পিটৰ সম্পর্কই যেন হলীউডৰ গ্লেমাৰকেই সার্থক কৰি তুলিছিল৷ মানুহে তেওঁলোকৰ প্রতিটো পদক্ষেপ অনুসৰণ কৰিছিল৷ তেওঁলোকে কৰা চিনেমা, তেওঁলোকৰ সমাজসেৱা আৰু অৱশেষত তেওঁলোকৰ বিবাহ–বিচ্ছেদলৈকে প্রায় সকলো কাহিনী হৈ পৰিছিল আৱেগিক ৰোলাৰ–কোষ্টাৰ৷
প্রেম এক সার্বজনীন অভিজ্ঞতা৷ আনৰ ব্যক্তিগত জীৱনৰ বিষয়ে আমি সিমান এটা নাজানিব পাৰোঁ, কিন্তু তেওঁলোকৰ প্রেমৰ কথা শুনিলে আমি সহজতে ৰিলেট কৰিব পাৰোঁ৷ চেলিব্রিটীসকল সাধাৰণতে আমাৰ পৰা বহু দূৰৈৰ পৃথিৱী এখনত বাস কৰা যেন লাগে৷ কিন্তু তেওঁলোকৰ ৰোমাণ্টিক সম্পর্কবোৰে চিনাকি বিষয়বোৰেই প্রতিফলিত কৰে৷ আৱেগ, ভগ্ণ হূদয়, বিশ্বাসঘাতকতা, মিলন– আমি সহজতেই বুজি পাওঁ৷ প্রখ্যাতসকলৰ আপাত দৃষ্টিত নিখুঁত জীৱনত আমি নিজৰ ইচ্ছা, ভুল আৰু নিৰাপত্তাহীনতা প্রতিফলিত হোৱা দেখা পাওঁ৷ অর্থাৎ প্রেম এক সার্বজনীন থীম৷ ৰাজকুমাৰ চার্লছ আৰু ৰাজকুমাৰী ডায়েনাৰ বিবাহ যেতিয়া ছিন্ন–ভিন্ন হৈ পৰিল, তেতিয়া ই তেওঁলোকক মানৱীয় কৰি তুলিলে৷ ৰাজকীয় মর্যাদা থকা সত্ত্বেও তেওঁলোক প্রকৃত আৱেগিক প্রত্যাহ্বানৰ সন্মুখীন হৈছিল, যাৰ অনুৰণন হৈছিল লাখ লাখ লোকৰ মাজত৷
বিখ্যাত লোকসকল সংবাদ মাধ্যম, সামাজিক মাধ্যমত অনবৰতে দপ্দপাই থাকে৷ খাবলৈ, শুবলৈ, বাথৰুমলৈ যাওঁতেও আমি তেওঁলোকক দেখি থাকোঁ৷ আমাৰ লগত তেওঁলোকৰ উপস্থিতি অহৰহ৷ তেওঁলোক যেন আমাৰ ব্যক্তিগত জীৱনৰে অংশ৷ আমাৰ যেন খুব চিনাকি৷ অন্তৰংগতা আৰু সংযোগ ভ্রম৷ এটা একপক্ষীয় সংযোগ য’ত সাধাৰণ মানুহে এই ব্যক্তিসকলৰ লগত ঘনিষ্ঠ অনুভৱ কৰে, অথচ সেই লোকসকল এই মানুহবোৰৰ বিষয়ে অজ্ঞাত৷
অতি বিখ্যাত লোকসকল এক অর্থত আধুনিক যুগৰ পৌৰাণিক ব্যক্তি৷ আধুনিক মীথ৷ তেওঁলোকৰ নাটকীয় প্রেম জীৱন মহাকাব্যিক৷ তেওঁলোকৰ নিষিদ্ধ ৰোমাঞ্চ আৰু কৰুণ বিচ্ছেদ উভয়েই সন্মোহিত কৰে৷ ৰিচার্ড বার্টন আৰু এলিজাবেথ টেইলৰৰ প্রেম, বিয়া, বিবাহিত জীৱন আৰু বিচ্ছেদে আৱেগিকভাৱে আচ্ছন্ন কৰি ৰাখিছিল মানুহক৷
নাটকে সকলোৰে দৃষ্টি আকর্ষণ কৰে৷ কিন্তু অবিশ্বাস, নিষিদ্ধ প্রেম বা গোপন কাম–কাজৰ দৰে নাটকীয় একো নাই৷ বিল ক্লিণ্টন আৰু মণিকা লিউনস্কিৰ সম্পর্ক ইয়াৰ এক নিখুঁত উদাহৰণ৷ ক্ষমতা, প্রেম আৰু গোপনীয়তাৰ মিশ্রণে ইয়াক কৰি তুলিছিল আধুনিক ইতিহাসৰ অন্যতম বহুলভাৱে চর্চিত সম্পর্ক৷
কিছু লোকৰ বাবে বিখ্যাতসকলৰ প্রেমৰ জীৱনৰ অনুসৰণে নিজৰ জীৱনৰ আৱেগিক শূন্যতা পূৰণ কৰাত সহায় কৰে৷ তেওঁলোকে হয়তো নিজৰ জীৱনত ৰোমাঞ্চ, উত্তেজনা বা নাটকৰ বাবে হাহাকাৰ কৰি আছে৷ আনৰ সম্পর্কৰ উত্থান–পতনৰ বিষয়ে কথা পতা, চোৱা বা পঢ়া তেওঁলোকৰ বাবে হৈ পৰে এক আৱেগিক বৈজান৷ জন লেনন আৰু য়ক’ অ’ন’ৰ সম্পর্কক বহু অনুৰাগীয়ে নিজা কল্পনাৰে চাইছিল, তেওঁলোকক অমৰ প্রেমৰ প্রতীক হিচাপে লৈছিল৷ তেওঁলোকৰ সংযোগক কলাত্মক, বৌদ্ধিক আৰু আধ্যাত্মিক হিচাপে লৈ নিজৰ জীৱনৰ আদর্শ কৰি লৈছিল৷
প্রেমৰ আলোচনা বা আনৰ প্রেমৰ গুজবৰ আলোচনাই সামাজিক বন্ধনৰ সৃষ্টি কৰে৷ আনৰ প্রেমৰ জীৱনৰ বিষয়ে আলোচনা কৰিলে, সেয়া কোনোবা চেলিব্রিটী হওক বা বন্ধু হওক, সামাজিক বন্ধনৰ ভাবৰ সৃষ্টি হয়৷ গুজব হৈছে যোগাযোগৰ এনে এক প্রকাশ যি নিমিষতে মানুহক ওচৰ চপাই আনে৷ বিখ্যাত হওক, অখ্যাত হওক, আনৰ প্রেমৰ আলোচনাই আমাৰ মাজত এক তাৎক্ষণিক সংযোগ স্থাপন কৰে৷
আনৰ সম্পর্কৰ বিষয়ে আলোচনা কৰি মানুহে নিজৰ নৈতিক সীমা আৰু বিচাৰ জুখি চোৱাৰ সুযোগ পায়৷ সচেতনভাৱে হওক বা অৱচেতনভাৱে হওক, মানুহে নিজৰ মূল্যবোধ, সম্পর্কৰ নীতি–নিয়ম আৰু অভিজ্ঞতাক আনৰ সৈতে তুলনা কৰিবলৈ ভাল পায়৷
মানুহে প্রেমৰ বিষয়ে আলোচনা কৰিবলৈ ভাল পায়, কাৰণ ইয়াত ভালপোৱা–বিশ্বাস–অবিশ্বাস-প্ৰণয়-বিচ্ছেদ সকলো আৱেগ–অনুভূতিৰ মিশ্রণ পোৱা যায়৷ ই হৈছে সামাজিকভাৱে আনৰ সৈতে সংযোগ স্থাপনৰ, নিজৰ মূল্যবোধ আৰু অভিজ্ঞতাৰ ওপৰত চিন্তা কৰাৰ আৰু লগতে পলায়নবাদত লিপ্ত হোৱাৰ এক উপায়৷ এই আলোচনাবোৰে আমাৰ নিজৰ আৱেগিক জীৱনক অন্তর্দৃষ্টি প্রদান কৰে, যিয়ে প্রেম, সংযোগ আৰু যোগাযোগৰ প্রতি আমাৰ সার্বজনীন আকাংক্ষাক প্রতিফলিত কৰে৷
ফোন : ৯৪৩৫০–৪৮৪৮০