নিয়মীয়া বাৰ্তা, ৬ মে’: উজবেকিস্তানৰ ৰাজধানী টাছকেণ্টত উজলিল অসমৰ অভিজ্ঞ আর্চাৰ জয়ন্ত তালুকদাৰ নেতৃত্বাধীন ভাৰতীয় আর্চাৰী দল৷ এছিয়া কাপ আর্চাৰী ষ্টেজ–২ বিশ্ব ৰেংকিং প্রতিযোগিতাখনত স্বর্ণ পদক জয় কৰিলে জয়ন্ত তালুকদাৰ নেতৃত্বাধীন ভাৰতীয় পুৰুষ ৰিকার্ভ দলটোৱে৷ জয়ন্ত তালুকদাৰ, মৃণাল চৌহান আৰু তুষাৰ শ্বেলকেৰ দ্বাৰা গঠিত ভাৰতীয় দলটোৱে আজি অনুষ্ঠিত পুৰুষৰ দলীয় ৰিকার্ভৰ ফাইনেলত চিৰপ্রতিদ্বন্দ্বী চীনক ৫–১ৰ ব্যৱধানত পৰাস্ত কৰি স্বর্ণ পদক জয় কৰে৷ মেচখনৰ আৰম্ভণিৰ পৰাই ভাৰতীয় দলটোৱে সুন্দৰ প্রদর্শন দাঙি ধৰিছিল৷ প্রথমটো গেমৰ পৰাই অর্জুন বঁটা বিজয়ী অলিম্পিয়ান অসমসন্তান জয়ন্ত তালুকদাৰকে ধৰি সতীর্থ মৃণাল আৰু তুষাৰেও দুর্দান্ত প্রদর্শন দাঙি ধৰিছিল৷ স্বর্ণ পদক দখলৰ যুঁজৰ মেচখনত ভাৰতীয় দলটোৰ জয়ৰ মূলতে আছিল জয়ন্ত তালুকদাৰৰ চমকপ্রদ প্রদর্শন৷ অসমসন্তানগৰাকীৰ প্রায় একক প্রচেষ্টাৰ বাবেই ভাৰতীয় দলটোৱে স্বর্ণ জয়ৰ সোৱাদ লাভ কৰে৷ স্বর্ণ পদকজয়ী ভাৰতীয় ৰিকার্ভ দলটোক অভিনন্দন জনাইছে ভাৰতীয় আর্চাৰী ফেডাৰেচনে৷ ইফালে, প্রতিযোগিতাখনত আজি ভাৰতে ৭টা স্বর্ণ, ৫টা ৰূপ আৰু ২টা ব্রঞ্জৰ পদকসহ মুঠ ১৪টা পদক দখল কৰি পদক তালিকাৰ শীর্ষস্থান লাভ কৰে৷ প্রতিযোগিতাখনৰ আজি অন্তিম দিনা ভাৰতে পাঁচটা স্বর্ণ, দুটা ৰূপ আৰু দুটা ব্রঞ্জৰ পদক জয় কৰে৷ পুৰুষৰ ৰিকার্ভৰ দলীয় আৰু মিক্সড শাখাৰ লগতে মহিলাৰ দলীয় কম্পাউণ্ড, মিক্সড কম্পাউণ্ডৰ দলীয় শাখা আৰু পুৰুষৰ কম্পাউণ্ডৰ দলীয় শাখাত স্বর্ণ পদক জয় কৰে৷ উল্লেখ্য যে জয়ন্ত তালুকদাৰ নেতৃত্বাধীন ভাৰতীয় ৰিকার্ভ দলটোৱে দুর্দান্ত প্রদর্শন দাঙি ধৰি প্রথমে কির্গিস্তান, তাৰ পিছত ঘৰুৱা দল উজবেকিস্তান আৰু ফাইনেলত শক্তিশালী চীনক পৰাস্ত কৰি দেশলৈ স্বর্ণ পদক কঢ়িয়াই আনে৷