নিউজডেস্ক, ২২ ডিচেম্বৰঃ ঘৰুৱা দল টীম ইণ্ডিয়া আৰু ৱেষ্ট ইণ্ডিজৰ মাজৰ তিনিখনীয়া এদিনীয়া মেচৰ শৃংখলাটোৰ তৃতীয় তথা নির্ণায়ক মেচখন আজি কটকত অনুষ্ঠিত হ’ব৷
ইতিমধ্যে হৈ যোৱা প্রথম দুখন মেচত দুয়োটা দলে এখনকৈ মেচত জয়লাভ কৰি শৃংখলাটো ১–১ত সমতা স্থাপন কৰাত এই মেচখনে বিশেষ তাৎপর্য বহন কৰিছে৷
দ্বিতীয়খন মেচত দুর্দান্ত বেটিং–বলিং প্রদর্শনেৰে বিজয় সাব্যস্ত কৰি আত্মবিশ্বাস তুংগত থকা বিৰাট কোহলি নেতৃত্বাধীন টীম ইণ্ডিয়াই আজিৰ নির্ণায়ক মেচখনত বিজয় সাব্যস্ত কৰি শৃংখলাটো দখলৰ লক্ষ্য লৈছে৷
অৱশ্যে শক্তিশালী ৱেষ্ট ইণ্ডিজৰ বিৰুদ্ধে মেচখনত বিজয় সাব্যস্ত কৰাটো কঠিন হ’ব ভাৰতীয় দলটোৰ৷
আজিৰ মেচখনত বিজয় সাব্যস্ত কৰি চলিত বর্ষটো সফলতাৰে সামৰাৰ লক্ষ্য লোৱা বিৰাট কোহলি বাহিনীয়ে পূর্ণ শক্তিৰে মেচখনত অৱতীর্ণ হ’ব৷ ইফালে, এই নির্ণায়ক মেচখনত বিজয় সাব্যস্ত কৰিব পাৰিলে ভাৰতীয় দলটোৱে ৱেষ্ট ইণ্ডিজৰ বিপক্ষে ক্রমাগত দশমটো এদিনীয়া শৃংখলা জয়ৰ গৌৰৱ অর্জন কৰিবলৈ সক্ষম হ’ব৷
খেলৰ সময়ঃ দুপৰীয়া ১.৩০ বজা