কোহলিৰ অনুপস্থিতিত প্রত্যাৱর্তনৰ আশা নাই টীম ইণ্ডিয়াৰ

নিয়মীয়া বাৰ্তা ২৩ ডিচেম্বৰঃ প্রথম টেষ্টত বিধ্বস্ত হোৱাৰ পিছত টীম ইণ্ডিয়াই অষ্ট্রেলিয়াৰ বিৰুদ্ধে পৰৱর্তী তিনিখন মেচত মূৰ দাঙি উঠাৰ সম্ভাৱনা তেনেই ক্ষীণ৷ বিশেষকৈ অধিনায়ক বিৰাট কোহলি স্বদেশলৈ উভতি যোৱাৰ পিছত দলটোৰ উদ্যম যথেষ্টখিনি হ্রাস পাব৷ এনে পৰিস্থিতিত টীম ইণ্ডিয়া শৃংখলাত হোৱাইট ৱাছৰ সন্মুখীন হোৱাৰ আশংকা আছে৷ এই মন্তব্য আগবঢ়াইছে অষ্ট্রেলিয়াৰ প্রাক্তন ক্রিকেটাৰ মার্ক ৱ’ই৷ একালৰ নির্ভৰযোগ্য মিডল অর্ডাৰ বেটছমেনগৰাকীয়ে আজি কয় যে ভাৰতে শৃংখলাত প্রত্যাৱর্তন ঘটোৱাক লৈ তেওঁ মুঠেই আশাবাদী নহয়৷ ‘এডিলেইড টেষ্টত ভাৰতে জয়েৰে সুন্দৰ আৰম্ভণি ঘটোৱাৰ সুৱর্ণ সুযোগ লাভ কৰিছিল৷ প্রথম ইনিংছত অগ্রগতি অর্জনৰ পিছতো দলটোৱে এই সুযোগ কার্যকৰী কৰিব নোৱাৰিলে৷ অধিনায়ক কোহলিও এতিয়া দলৰ সৈতে নাথাকিব৷ মহম্মদ ছামিও শৃংখলাৰ পৰা বাহিৰ হৈছে৷ গতিকে ভাৰতে প্রত্যাৱর্তন ঘটোৱাৰ মই কোনো আশা দেখা নাই৷’ মার্ক ৱ’ই এইদৰে কয়৷ উল্লেখ্য যে অষ্ট্রেলিয়াৰ প্রাক্তন ক্রিকেটাৰ ব্রেড হেডিনেও কালি সম্ভাৱনা ব্যক্ত কৰিছিল যে চলিত টেষ্ট শৃংখলাত ভাৰত হোৱাইট ৱাছৰ সন্মুখীন হ’ব৷ কোহলিৰ দৰে বিশ্বমানৰ বেটছমেন আৰু দক্ষ অধিনায়কৰ অনুপস্থিতিত ভাৰতে প্রত্যাৱর্তন ঘটোৱাটো অসম্ভৱ বুলি তেওঁ প্রকাশ কৰিছিল৷