নিয়মীয়া বাৰ্তা, ১৮অক্টোবৰঃ বিস্ফোৰক বেটছমেন এবি ডি ভিলিয়ার্ছ আৰু অধিনায়ক বিৰাট কোহলিৰ দুর্দান্ত বেটিঙৰ সহায়ত ৰয়েল চেলেঞ্জার্ছ বাংগালুৰুৱে চলিত আই পি এলত প্লে অফ খেলাৰ আশা সজীৱ কৰি তুলিছে৷ ডুবাইত শনিবাৰে অনুষ্ঠিত এখন মেচত দলটোৱে ৰাজস্থান ৰয়েলছক সাত উইকেটত পৰাস্ত কৰিবলৈ সক্ষম হয়৷ ১৭৮ ৰানৰ লক্ষ্যৰ পিছ লৈ ৰয়েল চেলেঞ্জার্ছ বাংগালুৰুৱে দুটা বল বাকী থকা অৱস্থাত তিনিটা উইকেটৰ বিনিময়ত জয় সাব্যস্ত কৰে৷ আৰ চি বিৰ ষষ্ঠটো জয়ৰ মূলতে আছিল ডি ভিলিয়ার্ছৰ আক্রমণাত্মক বেটিং৷ ইনিংছৰ শেষৰ ফালে বিস্ফোৰক ৰূপ ধাৰণ কৰি দক্ষিণ আফ্রিকাৰ তাৰকা বেটছমেনগৰাকীয়ে মাত্র ২২ বলত ৫৫ ৰানৰ আকর্ষণীয় ইনিংছ খেলে৷ তেওঁ এটা বাউণ্ডেৰী আৰু ছটা ছিক্সাৰ কোবায়৷ গুৰকিৰট সিঙৰ সৈতে তেওঁ চতুর্থ উইকেটত ৭৭ ৰান যোগ দি আৰ চি বিৰ জয় সুনিশ্চিত কৰে৷ অ’পেনাৰ দেৱদূত পাড়িকালে ৩৫ আৰু আৰন ফিনছে ১৪ ৰানত পেভিলিয়নমুখী হয়৷ অধিনায়ক কোহলিয়ে ৪৩ ৰানৰ অৰিহণা আগবঢ়ায়৷ তেওঁ ডি ভিলিয়ার্ছৰ সৈতে মূল্যৱান ৭৯ ৰান যোগ দিবলৈ সক্ষম হয়৷
ৰাজস্থান ৰয়েলছৰ হৈ শ্রেয়াছ গোপাল, কার্তিক ত্যাগী আৰু ৰাহুল টেৱাটিয়াই এটাকৈ উইকেট দখল কৰে৷ ইয়াৰ পূর্বে ৰাজস্থান ৰয়েলছে টছত জিকি ইনিংছ মুকলি কৰি নির্ধাৰিত ২০ অভাৰত ৬ উইকেটৰ বিনিময়ত ১৭৭ ৰান সংগ্রহ কৰে৷ অ’পেনাৰ ৰবীন উথাপ্পা আৰু বেন ষ্ট’কছে প্রাৰম্ভিক যুটিত ৫০ ৰান যোগ দি দলক সুন্দৰ আৰম্ভণি দিয়ে৷ উথাপ্পাই ২২ বলত সাতটা বাউণ্ডেৰী আৰু এটা অভাৰ বাউণ্ডেৰীৰে ৪১ ৰান সংগ্রহ কৰে৷ ষ্ট’কছে ১৫, সঞ্জু ছেমছনে ৯, জ’ছ বাটলাৰে ২৪ ৰানত আউট হয়৷ দীর্ঘদিনৰ মূৰত ফর্মলৈ উভতি অধিনায়ক ষ্টিভেন স্মিথে ৫৭ ৰানৰ দায়িত্বপূর্ণ ইনিংছ খেলে৷ তেওঁ ৩৬ বলত ৬টা বাউণ্ডেৰী আৰু এটা অভাৰ বাউণ্ডেৰী কোবায়৷ আৰ চি বিৰ হৈ দক্ষিণ আফ্রিকাৰ তাৰকা অলৰাউণ্ডাৰ ক্রিছ মৰিছে ২৬ ৰান ব্যয় কৰি ৪টা আৰু য়ুজবেন্দ্র ছাহালে ৩৪ ৰানত দুটা উইকেট দখল কৰে৷ এই জয়েৰে আৰ চি বিয়ে ৯খন মেচৰ পৰা পইণ্টৰ সংখ্যা ১২লৈ বৃদ্ধি কৰিবলৈ সক্ষম হৈছে৷ দলটোৱে এতিয়ালৈকে ছয়খন মেচত জয়ী হোৱাৰ বিপৰীতে তিনিখনত পৰাস্ত হৈছে৷