নিয়মীয়া বাৰ্তা, ২৯ জানুৱাৰীঃ প্ৰথমবাৰৰ বাবে আজিৰ পৰা ধুবুৰীত আৰম্ভ হৈছে ৭০সংখ্যক ভাৰত ৰত্ন লোকপ্ৰিয় গোপীনাথ বৰদলৈ ট্ৰফী-২০২৫ৰ লীগ পৰ্যায়ৰ খেল। অসম চৰকাৰৰ ক্ৰীড়া আৰু যুৱ কল্যাণ বিভাগ আৰু গুৱাহাটী ক্ৰীড়া সন্থাৰ উদ্যোগত তথা ধুবুৰীৰ জিলা ক্ৰীড়া সন্থাৰ সহযোগত ধুবুৰী চহৰৰ মাজমজিয়াৰ ৰজা প্ৰভাত চন্দ্ৰ বৰুৱা খেলপথাৰত আৰম্ভ হোৱা বৰদলৈ ট্ৰফী লীগ পৰ্যায়ৰ এই প্ৰতিযোগিতাখন অহা ৮ ফেব্ৰুৱাৰীলৈ চলিব। ধুবুৰীকে ধৰি জিলাখনৰ মুঠ ৮টাকৈ দলে অংশ লোৱা প্ৰতিযোগিতাখনৰ আজিৰ খেলখন ধুবুৰীৰ এভাৰগ্ৰীণ ক্লাব আৰু ধুবুৰী গৌৰীপুৰ ফুটবল কোচিং চেণ্টাৰৰ মাজত অনুষ্ঠিত হয়। খেলখনত এভাৰগ্ৰীণ ক্লাবে ৩-১ গোলত কোচিং চেন্টাৰক পৰাভূত কৰে।
প্ৰেৰক অমিতাভ চক্ৰৱৰ্তী