ভাৰতীয় ক্রিকেট নিয়ন্ত্রণ ব’ৰ্ডৰ অনুমতি অবিহনে শেহতীয়াকৈ এক জনবহুল অনুষ্ঠানত উপস্থিত আছিল ৰবি শাস্ত্রী আৰু বিৰাট কোহলি৷ ভাৰত আৰু ইংলেণ্ডৰ মাজত চতুর্থ টেষ্ট চলি থকাৰ মাজতে প্রশিক্ষক শাস্ত্রী ক’ভিড পজিটিভ হোৱাৰ পিছত এই তথ্য পোহৰলৈ আহিছে৷
ব’ৰ্ডৰ এগৰাকী শীর্ষ বিষয়াই মঙলবাৰে সংবাদ মাধ্যমৰ আগত প্রকাশ কৰা অনুসৰি শাস্ত্রী, কোহলি আৰু টীম ইণ্ডিয়াৰ অন্যান্য সদস্যসকলে যোৱা মঙলবাৰে লণ্ডনত এক গ্রন্থ উন্মোচনী সভাত উপস্থিত আছিল৷ এই সভাত যথেষ্টসংখ্যক লোকে ভিৰ কৰিছিল৷ শাস্ত্রী আৰু কোহলিয়ে গ্রন্থ উন্মোচনী সভাত মঞ্চ শুৱনি কৰিছিল বুলিও ব’ডৰ সূত্রটোৱে জানিবলৈ দিয়ে৷ প্রশিক্ষক আৰু অধিনায়কৰ লগতে টীম ইণ্ডিয়াৰ খেলুৱৈসকলে জৈৱ সুৰক্ষিত আবেষ্টনী ভংগ কৰি কিদৰে গ্রন্থ উন্মোচনী সভাত অংশ ল’লে, সেই সন্দর্ভত ব’র্ডে অনুসন্ধান চলাব৷
টেষ্ট শৃংখলাৰ সামৰণিৰ পিছতে শাস্ত্রী আৰু কোহলিৰ পৰাও ব’র্ডে বিষয়টো সন্দর্ভত জানিব বিচাৰিব বুলি বি চি চি আইৰ বিষয়াগৰাকীয়ে প্রকাশ কৰিছে৷ টীম ইণ্ডিয়াৰ মেনেজাৰ গিৰীশ ডংগ্রেৰ ভূমিকাক লৈও প্রশ্ন উত্থাপিত হৈছে৷ বুধবাৰে টি–২০ বিশ্বকাপৰ দল ঘোষণাৰ বাবে অনুষ্ঠিত হ’বলগীয়া বৈঠকত বিষয়টো উত্থাপন হোৱাৰ সম্ভাৱনা আছে৷ ইফালে, ব্রিটেইনৰ সংবাদ মাধ্যমত প্রকাশিত বাতৰি অনুসৰি ভাৰতীয় দলটোৱে জনবহুল অনুষ্ঠানটোত অংশ লোৱাৰ পূর্বে ইংলেণ্ড এণ্ড ৱেলছ ক্রিকেট ব’ডৰো অনুমতি লোৱা নাছিল৷
উল্লেখ্য যে শৃংখলাৰ পূর্বে বি চি চি আইৰ সচিব জয় শ্বাহে প্রতিগৰাকী খেলুৱৈক সতর্কতাৰে থাকিবলৈ আৰু জনসমাগমৰ পৰা আঁতৰি থাকিবলৈ আহ্বান জনাইছিল৷
মন কৰিবলগীয়া যে এই অনুষ্ঠানত অংশ লোৱাৰ পিছতে প্রশিক্ষক শাস্ত্রীৰ শৰীৰত ক’ভিড–১৯ৰ লক্ষণ দেখিবলৈ পোৱা যায় আৰু দেওবাৰে তেওঁ ক’ভিড পজিটিভ হয়৷ বলিং প্রশিক্ষক ভৰত অৰুণ আৰু ফিল্ডিং প্রশিক্ষক আৰ শ্রীধৰো ক’ভিডত আক্রান্ত হৈছে৷ টীম ইণ্ডিয়াৰ শিবিৰত ক’ভিডে আতংক সৃষ্টি কৰাৰ বাবে আগন্তুক মানচেষ্টাৰ টেষ্টত জৈৱ সুৰক্ষিত আবেষ্টনী অধিক কঠোৰ হ’ব বুলি বি চি চি আইৰ বিষয়াগৰাকীয়ে আজি জানিবলৈ দিয়ে৷