তাৰকা নেইমাৰ অবিহনে ব্রাজিলৰ নতুন যুগ আৰম্ভ

তাৰকা নেইমাৰ অবিহনে ব্রাজিলৰ নতুন যুগ আৰম্ভ

নিউজ ডেস্ক, ২৮ মে’ : ব্রাজিল ফুটবলত সূচনা হ’ল নতুন যুগৰ৷ ব্রাজিলৰ ৰাষ্ট্রীয় ফুটবল দলৰ প্রথম বিদেশী প্রশিক্ষক হিচাপে দায়িত্ব গ্রহণ কৰিলে ইটালীৰ বর্ষীয়ান প্রশিক্ষক কার্লো আনছেল’ট্টিয়ে৷

দায়িত্ব গ্রহণৰ কিছু সময়ৰ ভিতৰতে আসন্ন বিশ্বকাপৰ যোগ্যতা নির্ণয় ৰাউণ্ডৰ দুখন মেচৰ বাবে ব্রাজিলৰ ২৫জনীয়া দল ঘোষণা কৰে তেওঁ৷ তেওঁ ঘোষণা কৰা দলত সুযোগ লাভ কৰিছে দীর্ঘদিন ৰাষ্ট্রীয় দলৰ পৰা বাহিৰত থকা কাছেমিৰ’ৱে৷ প্রশিক্ষকগৰাকীয়ে ঘোষণা কৰা নতুন দলত আছে এণ্টনি৷ সুযোগ লাভ কৰিছে ৰিছার্লিছনে৷

অৱশ্যে নেইমাৰে এই দলত সুযোগ পোৱা নাই৷ প্রশিক্ষকগৰাকীয়ে কয় – ‘মই বিচাৰোঁ, যিসকল সম্পূর্ণৰূপে সুস্থ হৈ আছে তেওঁলোকে সুযোগ পাওক৷ নেইমাৰ সম্প্রতি আঘাতত ভুগি আছে৷ অৱশ্যে সকলোৱে জানে যে নেইমাৰ অতিশয় গুৰুত্বপূর্ণ খেলুৱৈ৷ দললৈ প্রত্যাৱর্তন ঘটাইছে গ’লৰক্ষক এলিছন বেকাৰে৷’ উল্লেখ্য যে প্রশিক্ষকগৰাকী বিমানবন্দৰৰ পৰা ওলাই অহাৰ সময়ত তাত বেছি জনসমাগম নাছিল৷

অলপতে চিডিএফৰ সভাপতি পদৰ বাবে নির্বাচিত হোৱা ছামিৰ জাউদে এনচেলোট্টিক আবেদন জনায়৷ ব্রাজিলত ভৰি দিয়াৰ পিছতে তেওঁক উপহাৰ দিয়া হয় ৯নং জার্ছী৷ সাংবাদিক সন্মিলনত তেওঁ কয় – ‘বিশ্বৰ শ্রেষ্ঠ জাতীয় দলটোৰ প্রশিক্ষকৰ দায়িত্ব পালন কৰাটো সন্মান আৰু গৌৰৱৰ কথা৷ মই বুজিব পাৰিছোঁ ব্রাজিল পুনৰ বিশ্ব চেম্পিয়ন হ’বলৈ বদ্ধপৰিকৰ৷ ময়ো সেই আশাই কৰিছোঁ৷’