🔹 তাৰকা পেচ বলাৰ যশপ্রীত সন্দর্ভত নতুন আপডেট
নিউজ ডেস্ক, ৩ এপ্রিল : চলিত আইপিএললৈ প্রত্যাৱর্তন কৰাত বিলম্ব হ’ব মুম্বাই ইণ্ডিয়ানছৰ তাৰকা পেচ বলাৰ যশপ্রীত বুমৰাহৰ৷ খেলুৱৈগৰাকীৰ আঘাত সন্দর্ভত নতুন আপডেট আহিছে৷ খেলুৱৈগৰাকীৰ সেৱা লাভ কৰিবলৈ মুম্বাই ইণ্ডিয়ানছে আৰু কিছুদিন অপেক্ষা কৰিব লাগিব৷ বুমৰাহক লৈ খবৰ আহিছিল যে তেওঁ ১ এপ্রিলৰ পৰা মুম্বাই ইণ্ডিয়ানছত যোগদান কৰিব৷ কিন্তু নতুনকৈ অহা আপডেট অনুসৰি তেওঁৰ প্রত্যাৱর্তনৰ তাৰিখ এতিয়াও নির্ধাৰণ হোৱা নাই৷ এপ্রিল মাহৰ মাজভাগত তেওঁ দলত যোগদান কৰাৰ সম্ভাৱনা আছে৷ সংবাদ প্রতিষ্ঠানৰ বাতৰি অনুসৰি বুমৰাহ এতিয়া সম্পূর্ণ ফিট৷ কিন্তু বিচিচিআইৰ চিকিৎসা দলটোৱে অনুভৱ কৰিছে যে তৎক্ষণাত তেওঁৰ কামৰ বোজা বৃদ্ধি কৰাটো পুনৰ বিপদক আমন্ত্রণ জনোৱাৰ দৰে হ’ব পাৰে৷ সেয়ে বুমৰাহক অধিক জিৰণি দিয়াৰ সিদ্ধান্ত লৈছে৷ এই সিদ্ধান্তৰ আঁৰৰ কাৰণ হৈছে আইপিএলৰ ঠিক পিছতেই ইংলেণ্ডত অনুষ্ঠিত হ’বলগীয়া টেষ্ট শৃংখলা৷ বিচিচিআইৰ সূত্রৰ উদ্ধৃতি দি প্রকাশ কৰা এক প্রতিবেদনত লিখা হৈছে যে বুমৰাহৰ আঘাত কিছু গুৰুতৰ৷ এনে পৰিস্থিতিত তেওঁ যাতে পুনৰ ষ্ট্রেছ ফ্রেক্টৰত ভুগিব লগা নহয় তাৰ প্রতি যত্ন লোৱা হৈছে৷ বুমৰাহ নিজেই এই বিষয়ক লৈ অতি সাৱধান৷ বিচিচিআইৰ চেণ্টাৰ অৱ এক্সিলেঞ্চত বলিঙৰ আৰম্ভণি কৰিছে বুমৰাহে৷ কিন্তু তেওঁক পুনৰ নিজৰ ছন্দলৈ আহিবলৈ সময় লাগিব পাৰে৷ বর্তমান তেওঁৰ উভতি অহাৰ কোনো তাৰিখ নির্ধাৰণ কৰা হোৱা নাই৷ সম্ভৱতঃ এপ্রিলৰ মাজভাগলৈকে তেওঁ ঘূৰি আহিব পাৰে৷