নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

দশকৰ শ্রেষ্ঠ এদিনীয়া, টি–২০ দলৰ নেতৃত্বত ধোনী

নিয়মীয়া বাৰ্তা ২৮ ডিচেম্বৰঃ আই চি চিৰ দশকৰ শ্রেষ্ঠ এদিনীয়া আৰু টি–২০ দলৰ অধিনায়ক নির্বাচিত হৈছে ভাৰতৰ অন্যতম সফল অধিনায়ক মহেন্দ্র সিং ধোনী৷ চলিত বর্ষৰ ১৫ আগষ্টত আন্তঃৰাষ্ট্রীয় ক্রিকেটক বিদায় জনোৱা ৩৯ বছৰীয়া তাৰকাগৰাকীক অধিনায়ক হিচাপে নির্বাচিত কৰি আন্তঃৰাষ্ট্রীয় ক্রিকেট কাউঞ্চিলে  এদিনীয়া আৰু টি–২০ দল ঘোষণা কৰিছে৷ ধোনীৰ সৈতে ৰোহিত শর্মা আৰু বিৰাট কোহলিয়ে আই চি চিৰ দশকৰ শ্রেষ্ঠ এদিনীয়া দলত স্থান লাভ কৰিবলৈ সক্ষম হৈছে৷ ইফালে টি–২০ দলটোত ভাৰতৰ সর্বাধিক চাৰিগৰাকী খেলুৱৈয়ে স্থান লাভ কৰিছে৷ ধোনী, ৰোহিত, কোহলিৰ সৈতে এই দলটোত আছে তাৰকা বেগী বলাৰ যশপ্রীত বুমৰাহ৷ ইফালে, আই চি চিয়ে ঘোষণা কৰা দশকৰ শ্রেষ্ঠ টেষ্ট দলটোৰ অধিনায়কৰ দায়িত্ব লাভ কৰিছে বিৰাট কোহলিয়ে৷ এই দলটোত ভাৰতৰ দ্বিতীয়গৰাকী ক্রিকেটাৰ হিচাপে স্থান পাইছে অভিজ্ঞ অফ স্পিনাৰ ৰবিচন্দ্রন অশ্বিনে৷ লক্ষণীয়ভাৱে টেষ্ট দলটোত ধোনীৰ পৰিৱর্তে উইকেট ৰক্ষক হিচাপে নির্বাচিত হৈছে শ্রীলংকাৰ কিংবদন্তি কুমাৰ ছাংগাকাৰা৷

দশকৰ শ্রেষ্ঠ টেষ্ট দল: এলিষ্টাৰ কুক (ইংলেণ্ড), ডেভিড ৱার্নাৰ (অষ্ট্রেলিয়া), কেন উইলিয়ামছন (নিউজিলেণ্ড), বিৰাট কোহলি, অধিনায়ক (ভাৰত), ষ্টিভেন স্মিথ (অষ্ট্রেলিয়া), কুমাৰ ছাংগাকাৰা (শ্রীলংকা), বেন ষ্ট’কছ (ইংলেণ্ড), ৰবিচন্দ্রন অশ্বিন (ভাৰত), ডেইল ষ্টেইন (দক্ষিণ আফ্রিকা), ষ্টুৱার্ট ব্র’ড (ইংলেণ্ড), জেমছ এণ্ডাৰছন (ইংলেণ্ড)৷

দশকৰ শ্রেষ্ঠ এদিনীয়া দল: ৰোহিত শর্মা, ডেভিড ৱার্নাৰ, বিৰাট কোহলি, এবি ডি ভিলিয়ার্ছ, ছাকিব অল হাছান, এম এছ ধোনী (অধিনায়ক), বেন ষ্ট’কছ, মিচেল ষ্টার্ক, ট্রেণ্ট ব’ল্ড, ইমৰান তাহিৰ আৰু লাচিথ মালিংগা৷

দশকৰ শ্রেষ্ঠ টি–২০ দল: ৰোহিত শর্মা, ক্রিছ গেইল, আৰন ফিনছ, বিৰাট কোহলি, এ বি ডি ভিলিয়ার্ছ, গ্লেন মেক্সৱেল, এম এছ ধোনী (অধিনায়ক), কিৰণ পোলার্ড, ৰছিদ খান, যশপ্রীত বুমৰাহ আৰু লাচিথ মালিংগা৷

You might also like