🔹 মহিলা শাখাত নাহৰকটীয়া মহাবিদ্যালয়-পুৰুষ শাখাত পশ্চিম ধেমাজি মহাবিদ্যালয় বিজয়ী
নাহৰকটীয়া, ৫ নৱেম্বৰ : শিৱসাগৰ বাণিজ্য মহাবিদ্যালয়ত অনুষ্ঠিত হোৱা ডিব্ৰুগড় বিশ্ববিদ্যালয়ৰ আন্তঃমহাবিদ্যালয় ভলীবল প্ৰতিযোগিতাত মহিলা শাখাত নাহৰকটীয়া মহাবিদ্যালয়ে চূড়ান্ত বিজয়ীৰ খিতাপ অর্জন কৰিবলৈ সক্ষম হৈছে। মুঠ ১৭খনকৈ মহাবিদ্যালয়ে অংশগ্ৰহণ কৰা প্ৰতিযোগিতাখনৰ কালি সন্ধিয়া অনুষ্ঠিত চূড়ান্ত খেলখনিত নাহৰকটীয়া মহাবিদ্যালয় দলে তিনিচুকীয়া মহাবিদ্যালয় দলক পোনপটীয়া ছেটত ২-০ৰ ব্যৱধানত পৰাস্ত কৰি চূড়ান্ত বিজয়ীৰ খিতাপ লাভ কৰিবলৈ সক্ষম হয়। উল্লেখযোগ্য যে মহাবিদ্যালয়ৰ গ্ৰন্থাগাৰিক সুৰজ গগৈ আৰু শাৰীৰিক নিৰ্দেশক উৎপল ডেকাই প্ৰশিক্ষণ দিয়া নাহৰকটীয়া মহাবিদ্যালয় দলটোৰ নেহা কুমাৰীয়ে শ্ৰেষ্ঠ স্পাইকাৰৰ বঁটা লাভ কৰাৰ লগতে শ্ৰেষ্ঠ ছেটাৰৰ বঁটা লাভ কৰে একেটা দলৰে সংগীতা বৰাই। আনহাতে, পুৰুষৰ শাখাত পশ্চিম ধেমাজি মহাবিদ্যালয় দলে উত্তৰ লখিমপুৰ মহাবিদ্যালয় দলক পৰাস্ত কৰি চূড়ান্ত বিজয়ী হবলৈ সক্ষম হয়।
প্ৰেৰক প্ৰাঞ্জল ভূঞা