🔹 ব্যর্থ কিং কোহলি
নিউজ ডেস্ক, ৩ এপ্রিল : শুভমন গিল নেতৃত্বাধীন গুজৰাট টাইটানছে চলিত আইপিএলত দ্বিতীয়টো জয়ৰ সোৱাদ লাভ কৰিছে৷ বেংগালুৰুত কালি অনুষ্ঠিত মেচখনত গুজৰাটে ঘৰুৱা দল ৰয়েল চেলেঞ্জার্ছ বেংগালুৰুক ৮ উইকেটত পৰাস্ত কৰে৷ বেংগালুৰুৱে জয়ৰ বাবে বান্ধি দিয়া ১৭০ ৰানৰ লক্ষ্য অনুসৰণ কৰিবলৈ আহি জ’ছ বাটলাৰৰ দুর্দান্ত অপৰাজিত ৭৩ ৰানৰ সহায়ত গুজৰাটে ১৭.৫ অভাৰত দুটা উইকেট হেৰুৱাই জয়ৰ লক্ষ্যত উপনীত হয়৷ অপেনাৰ ছাই সুদর্শনে ৪৯ আৰু অধিনায়ক গিলে ১৪ ৰান কৰি বিদায় লয় যদিও শ্বেৰফান ৰাডাৰফ’র্ডে ৩০ ৰান কৰি অপৰাজিত হৈ থাকে৷ ইয়াৰ পূর্বে প্রথমে বেটিং কৰিবলৈ আহি প্রাৰম্ভিক বিপর্যয় সত্ত্বেও লিয়াম লিভিংষ্টনৰ অর্ধশতকৰ সহায়ত ৰয়েল চেলেঞ্জার্ছ বেংগালুৰুৱে নির্ধাৰিত ২০ অভাৰত ৮টা উইকেট হেৰুৱাই ১৬৯ৰান সংগ্রহ কৰে৷ ইনিংছৰ আৰম্ভণি মুঠেই সুখকৰ নাছিল বেংগালুৰুৰ। দলীয় স্ক’ৰ ৪২ ৰানতে আগশাৰীৰ বেটাৰ বিৰাট কোহলি (৭), দেৱদূত পাড়িকাল (৪), অপেনাৰ ফিল ছল্ট (১৪) আৰু অধিনায়ক ৰজত পাটিদাৰ (১২)ক হেৰুৱায়৷ অৱশ্যে লিভিংষ্টনে জিতেশ শর্মাৰ সৈতে লগ লাগি পঞ্চম উইকেটত ৫২ ৰান সংগ্রহ কৰি দলৰ বিপর্যয় কিছু ৰোধ কৰে৷ জিতেশে ২১টা বলত ৩৩ ৰান কৰি বিদায় লয়৷ ইফালে, ৪০টা বলত এটা চাৰি আৰু পাঁচটা ছয়েৰে ৫৪ ৰান কৰি আউট হোৱাৰ পূর্বে লিভিংষ্টনে সপ্তম উইকেট টিম ডেভিদৰ সৈতে গুৰুত্বপূর্ণ ৪৬ ৰান সংগ্রহ কৰে৷ ডেভিদে ১৮টা বলত ৩২ ৰানৰ অৰিহণা আগবঢ়ায়৷ ক্রুনাল পাণ্ডিয়াই মাত্র ৫ ৰান কৰি বিদায় লয়৷ গুজৰাটৰ হৈ মহম্মদ ছিৰাজে সর্বাধিক তিনিটা উইকেট লাভ কৰে৷