🔹 আজি তৃতীয় টি–২০ : পুনৰ অনিশ্চিত মহম্মদ ছামি
নিউজ ডেস্ক, ২৮ জানুৱাৰী : ৰাজকোটত শৃংখলা দখলৰ লক্ষ্য লৈছে সূর্যকুমাৰ নেতৃত্বাধীন টীম ইণ্ডিয়াই৷ ভ্রমণকাৰী দল ইংলেণ্ডৰ বিপক্ষে খেলি থকা পাঁচখনীয়া টি–২০ মেচৰ শৃংখলাটোৰ তৃতীয়খন মেচ আজি ৰাজকোটত অনুষ্ঠিত হ’ব৷ ইতিমধ্যে শৃংখলাটোত ২–০ৰ অগ্রগতি লাভ কৰা ঘৰুৱা দলটোৱে আজি মেচখনত বিজয় সাব্যস্ত কৰি টি–২০ শৃংখলাটো দখল কৰাৰ লক্ষ্যৰে নামিব৷ শৃংখলাটোৰ প্রথম দুখন মেচত টীম ইণ্ডিয়াৰ মূল একাদশত স্থান লাভ নকৰা তাৰকা পেচ বলাৰ মহম্মদ ছামিৰ আজিৰ মেচখনতো খেলাৰ সম্ভাৱনা নিচেই কম৷ এক সূত্রৰ পৰা জানিব পৰা মতে, ছামিৰ শৃংখলাটোৰ পৰৱর্তী মেচকেইখনতো অংশগ্রহণ কৰাৰ আশা ক্ষীণ ৷ বাকী বলাৰসকলে সুন্দৰ প্রদর্শন আগবঢ়াই থকাৰ বাবেই ছামিক ইংলেণ্ডৰ বিপক্ষে খেলিবলগীয়া এদিনীয়া শৃংখলাটোৰ বাবে সাজু কৰি তোলাৰ প্রয়াস কৰিছে দলীয় মেনেজমেণ্টে৷ ইফালে, নিজৰ প্রদর্শনক লৈ সন্তুষ্ট নহয় অধিনায়ক সূর্যকুমাৰ যাদৱ৷ অৱশ্যে আজিৰ মেচখনত নিজৰ ছন্দ ওভতাই অনাৰ বাবে চেষ্টা চলাব বুলি উল্লেখ কৰি অধিনায়কগৰাকীয়ে কয় যে অভিষেক শর্মা, তিলক বার্মা আৰু বৰুণ চক্রৱর্তীয়ে উন্নত প্রদর্শন দাঙি ধৰিছে যদিও বাকীসকলে তেওঁলোকক সহযোগ কৰাত সম্পূর্ণৰূপে ব্যর্থ হৈছে৷ আশা কৰিছোঁ- সতীর্থসকলে পৰৱর্তী মেচকেইখনত নিজৰ দায়িত্ব সুচাৰুৰূপে পালন কৰিব৷ ইফালে, শৃংখলাটোত প্রত্যাৱর্তনৰ লক্ষ্যৰে নামিব ইংৰাজ বাহিনী৷ প্রথম দুয়োখন মেচতে পৰাস্ত হৈ শৃংখলা হেৰুওৱাৰ শংকাত ভোগা ইংলেণ্ডে আজিৰ মেচখনত জয়লাভ কৰি শৃংখলাটোত বর্তি থকাৰ বাবে সকলোধৰণৰ প্রচেষ্টা চলাব৷ আজিৰ মেচখনত সতীর্থসকলে উন্নত প্রদর্শন দাঙি ধৰিব পাৰিব বুলি আশা ব্যক্ত কৰে দলটোৰ অধিনায়ক জ’ছ বাটলাৰে৷ খেলৰ সময় : নিশা ৭ বজা৷