🔹 অধিনায়কৰূপে অভিষেক ঘটিব সূর্যকুমাৰ যাদৱৰ
বিশেষ বাৰ্তা, ২৩ নৱেম্বৰ : বিশ্বকাপ সমাপ্ত হোৱাৰ চাৰি দিনৰ পিছতে আজি মুখামুখি হ’ব দুই ফাইনেলিষ্ট ভাৰত আৰু অষ্ট্রেলিয়া৷ এইবাৰ দল দুটাই ৫খনীয়া টি–২০ শৃংখলাত পৰস্পৰৰ বিৰুদ্ধে খেলিব৷ আজি বিশাখাপট্টনমৰ ৱাই এছ ৰাজাশেখৰ ৰেড্ডী ক্রিকেট ষ্টেডিয়ামত শৃংখলাৰ প্রথমখন মেচত দল দুটা অৱতীর্ণ হ’ব৷ বিশ্বকাপৰ ফাইনেলত পৰাজয়ৰ পিছত এই শৃংখলাটোত ভাৰতীয় দলৰ কেইবাজনো জ্যেষ্ঠ খেলুৱৈক জিৰণি দিয়া হৈছে৷ ফলত প্রথমবাৰৰ বাবে ভাৰতীয় দলক নেতৃত্ব প্রদান কৰি অধিনায়ক ৰূপে অভিষেক ঘটাব সূর্য কুমাৰ যাদৱে৷ ইয়াৰ বিপৰীতে অষ্ট্রেলিয়াৰ মেথিও ৱাডেই কেংগাৰু বাহিনীক নেতৃত্ব প্রদানৰ সুযোগ লাভ কৰিছে৷ বিশ্ব চেম্পিয়ন দলটোৰো কেইবাগৰাকী খেলুৱৈ দেশলৈ উভতি গৈছে যদিও ট্রেভিছ হেড, গ্লেন মেক্সৱেল, জ’শ ইংলিছ, আডাম জাম্পা আদিৰ দৰে তাৰকা খেলুৱৈৰে গঠিত অষ্ট্রেলিয়া দলটো যথেষ্ট শক্তিশালী ৰূপে পৰিগণিত হৈছে৷ অৱশ্যে শৃংখলাটোত বিশ্বকাপৰ ফলাফলে প্রভাৱ নেপেলায় বুলি দাবী কৰিছে অধিনায়ক যাদৱে৷ তেওঁ কয় যে যুৱ তাৰকাৰে গঠিত ভাৰতীয় দলটোৱে পৰাজয়ৰ স্মৃতি পাহৰি নতুন শৃংখলাটোত নতুন ৰূপত অৱতীর্ণ হ’ব বিচাৰে৷ খেলৰ সময় : সন্ধিয়া ৭ বজা৷