নিয়মীয়া বাৰ্তা ডিজিটেল, ১৩ জুলাই : চতুৰ্থ টি-২০ মেচত জিম্বাবুৱেক ১০ উইকেটত পৰাস্ত কৰিছে ভাৰতে। ইয়াৰ লগে লগে ভাৰতে পাঁচখন খেলৰ শৃংখলাত ৩-১ত অগ্ৰগতি লাভ কৰিছে। জিম্বাবুৱেৰ বলাৰসকলে টীম ইণ্ডিয়াৰ প্ৰথম উইকেটৰ পাৰ্টনাৰশ্বিপ ভাঙিব নোৱাৰিলে। যশস্বী জয়ছোৱালে ৫৩টা বলত ৯৩ ৰান কৰাৰ বিপৰীতে অধিনায়ক শুভমন গিলে ৩৯টা বলত ৫৮ ৰানৰ গুৰুত্বপূৰ্ণ অৱদান আগবঢ়ায়। প্ৰথমে বেট ধৰি জিম্বাবুৱেই ১৫২ ৰান কৰে আৰু ভাৰতে ২৮টা বল বাকী থকা অৱস্থাত লক্ষ্যত উপনীত হয়। জিম্বাবুৱেৰ হৈ চিকন্দৰ ৰাজাই সৰ্বাধিক ৪৬ ৰান কৰে। আনহাতে যোৱা মেচখনত জিম্বাবুৱেৰ হৈ ভাল খেলা ডিয়ন মায়াৰ্ছে এইবাৰ মাত্ৰ ১২ ৰানহে কৰে। প্ৰত্যুত্তৰত লক্ষ্যৰ পিছ লৈ খেলি যশস্বী জয়ছোৱাল আৰু শুভমন গিলে দলৰ হৈ বিজয় নিশ্চিত কৰে। প্ৰথম অভাৰৰ পৰাই যশস্বী জয়ছোৱালে ধুমুহাময় বেটিং আৰম্ভ কৰে। জয়ছোৱালে মাত্ৰ ২৯টা বলত অৰ্ধশতক সম্পূৰ্ণ কৰিছিল যদিও তেওঁ শতক সম্পূৰ্ণ কৰিব নোৱাৰিলে। জয়ছোৱালে ১৩টা চাৰি আৰু ২টা ছয় কৰাৰ বিপৰীতে ৫৩টা বলত ৯৩ ৰান সংগ্ৰহ কৰে। অধিনায়ক গিলে ৬টা চাৰি আৰু ২টা ছয়ৰ বিপৰীতে ৩৯টা বলত ৫৮ ৰানৰ ইনিংছ খেলে।উল্লেখ্য যে এতিয়ালৈকে টি-২০ ক্ৰিকেটৰ ইতিহাসত বহু দলে ১০ উইকেটত লক্ষ্যত উপনীত হৈছে। ভাৰতে ২০১৬ চনত প্ৰথমবাৰৰ বাবে এই কাম কৰিছিল আৰু তেতিয়াও ভাৰতে কেৱল জিম্বাবুৱেৰ সন্মুখীন হৈছিল। সেই মেচখনো হাৰাৰেত অনুষ্ঠিত হৈছিল আৰু জিম্বাবুৱেই প্ৰথম খেলি থকাৰ সময়তে ৯৯ ৰান কৰিছিল। প্ৰত্যুত্তৰত কে এল ৰাহুল আৰু মনদ্বীপ সিঙৰ উদ্বোধনী যুটিয়ে ভাৰতক ১০ উইকেটত জয়লাভ কৰে। সেই মেচখনত মনদীপে ৪০টা বলত ৫২ ৰান আৰু ৰাহুলে ৪০টা বলত ৪৭ ৰান সংগ্ৰহ কৰি টীম ইণ্ডিয়াৰ ১০ উইকেটত জয় নিশ্চিত কৰে। এতিয়া শুভমন গিল আৰু যশস্বী জয়ছোৱালৰ যুটিয়ে দ্বিতীয়বাৰৰ বাবে টি-২০ মেচত ১০ উইকেটত জয়লাভ কৰাবলৈ সক্ষম হৈছে ভাৰতক।