নিয়মীয়া বাৰ্তা ৪ জুনঃ আই চি চি বিশ্ব টেষ্ট চেম্পিয়নশ্বিপৰ ফাইনেল আৰু ইংলেণ্ডৰ বিৰুদ্ধে খেলিবলগীয়া পাঁচখন মেচৰ টেষ্ট শৃংখলাৰ বাবে বিৰাট কোহলি নেতৃত্বাধীন টীম ইণ্ডিয়া লণ্ডনত উপস্থিত হৈছে৷ বুধবাৰে নিশা মুম্বাইৰ পৰা উৰা মৰা দলটোৱে আজি পুৱা লণ্ডনত অৱতৰণ কৰে৷
মন কৰিবলগীয়া যে টীম ইণ্ডিয়াৰ সৈতে একেখন চার্টার্ড বিমানেৰে ভাৰতীয় মহিলা ক্রিকেট দলটোও ইংলেণ্ডত উপস্থিত হৈছে৷ পুৰুষ দলটোৱে বিশ্ব টেষ্ট চেম্পিয়নশ্বিপৰ ফাইনেল আৰু ইংলেণ্ডৰ বিৰুদ্ধে টেষ্ট শৃংখলাত ব্যস্ত থকাৰ সময়ত মহিলা দলটোৱে ঘৰুৱা দলে ইংলেণ্ডৰ বিৰুদ্ধে এখন টেষ্ট, তিনিখন এদিনীয়া আৰু তিনিখন টি–২০ৰ মেচৰ শৃংখলাত অৱতীর্ণ হ’ব৷ লণ্ডনত উপস্থিত হোৱাৰ পিছতে দল দুটাক পৃথকে পৃথকে ছাউদাম্পটনলৈ লৈ যোৱা হয়৷ তাত তেওঁলোকে বাধ্যতামূলক কোৱাৰেণ্টাইনত থাকিব লাগিব৷
উল্লেখ্য যে অহা ১৮–২২ জুনত ভাৰতে ছাউদাম্পটনত নিউজিলেণ্ডৰ বিৰুদ্ধে বিশ্ব টেষ্ট চেম্পিয়নশ্বিপৰ ফাইনেল খেলিব৷