নিয়মীয়া বাৰ্তা ১৫ আগষ্টঃ অলিম্পিকৰ ইতিহাসত সর্বশ্রেষ্ঠ প্রদর্শন দাঙি ধৰা ভাৰতীয় দলটোক শনিবাৰে ৰাষ্ট্রপতি ৰামনাথ কোৱিন্দে সাক্ষাৎ কৰে৷ টকিঅ’ অলিম্পিকত দেশক প্রতিনিধিত্ব কৰা খেলুৱৈসকলৰ বাবে আয়োজন কৰা চাহমেলত ৰাষ্ট্রপতি কোৱিন্দে কয় যে ভাৰতৰ অলিম্পিক দলক লৈ সমগ্র দেশবাসী শনিবাৰে গৌৰৱান্বিত৷
ৰাষ্ট্রপতি ভৱনৰ সাংস্কৃতিক কেন্দ্রত আয়োজিত এই চাহমেলত ভাৰতীয় দলৰ সৈতে অসম কন্যা লাভলীনা বৰগোহাঁয়েও ভাগ লয়৷ টকিঅ’ অলিম্পিকত ব্রঞ্জৰ পদক জয়েৰে ইতিহাস ৰচা উদীয়মান বক্সাৰগৰাকীয়ে এই অনুষ্ঠানৰ বাবে কালি গৃহভূমি অসমৰ পৰা দিল্লীলৈ উভতি গৈছিল৷
শনিবাৰে ৰাষ্ট্রপতিক সাক্ষাতৰ পিছত ভাৰতীয় অলিম্পিক দলটোৱে কাইলৈ প্রধানমন্ত্রী নৰেন্দ্র মোদীৰ আমন্ত্রণমর্মে লালকিল্লাত স্বাধীনতা দিৱসৰ অনুষ্ঠানত উপস্থিত থাকিব৷
উল্লেখ্য যে ভাৰতে এইবাৰ টকিঅ’ অলিম্পিকৰ পৰা দেশলৈ অভিলেখসংখ্যক সাতটা পদক কঢ়িয়াই আনিবলৈ সক্ষম হয়৷ জেভলিন থ্র’ৱাৰ নীৰজ চোপ্রাই সোণৰ পদক অর্জন কৰাৰ লগতে মল্লযুঁজাৰু ৰবি দাহিয়া আৰু ভাৰোত্তোলক মীৰাবাঈ চানুৱে মেগা ইভেণ্টখনত ৰূপৰ পদক অর্জন কৰিছিল৷ একেদৰে মল্লযুঁজাৰু বজৰং পুনিয়া, বক্সাৰ লাভলীনা বৰগোহাঁই, শ্বাটলাৰ পি ভি সিন্ধু আৰু ভাৰতীয় পুৰুষ হকী দলটোৱে ব্রঞ্জৰ পদক লাভ কৰে৷