নিয়মীয়া বাৰ্তা, ২২ আগষ্টঃ মহামাৰী ক’ভিড–১৯ৰ ভয়াৱহ প্রাদুর্ভাৱৰ বাবে সৃষ্টি হোৱা অর্থনৈতিক মন্দাৱস্থাৰ সময়ছোৱাত ভাৰতীয় ক্রিকেট নিয়ন্ত্রণ ব’র্ডে দেশৰ ক্রিকেটাৰ আৰু বিষয়ববীয়াৰ দৰমহা কর্তনৰ পৰা বিৰত আছিল৷ কিন্তু শেহতীয়াকৈ ব’র্ডে বিষয়টো নতুনকৈ চিন্তা কৰিবলৈ বাধ্য হৈছে৷ ব’ডৰ এগৰাকী জ্যেষ্ঠ বিষয়ববীয়াই এই সন্দর্ভত প্রকাশ কৰা অনুসৰি অর্থনৈতিক মন্থৰতাৰ পৰা উদ্ধাৰ পাবলৈ বি চি চি আয়ে এতিয়া আই পি এলৰ সফল আয়োজনৰ ওপৰত নির্ভৰ কৰিছে৷ ‘খেলুৱৈৰ দৰমহা কর্তন অথবা বিষয়ববীয়াক কর্তব্যৰ পৰা অব্যাহতি দিয়াৰ বিষয়টো আমি পৰৱর্তী বৈঠকত আলোচনা কৰিম৷ অর্থনৈতিক মন্থৰতাই বি চি চি আইক কিদৰে প্রভাৱিত কৰিছে সেয়া আমি বিস্তৃতভাৱে আলোচনা কৰাৰ অন্তত এক সিদ্ধান্তত উপনীত হ’ব পাৰিম৷
অৱশ্যে খেলুৱৈৰ দৰমহা কর্তন অথবা বিষয়ববীয়াক কর্তব্যৰ পৰা অব্যাহতি দিয়াৰ সম্ভাৱনা নথকা নহয়৷ সকলোখিনি নির্ভৰ কৰিব আই পি এলৰ সফলতাৰ ওপৰত৷ শেহতীয়াকৈ আই পি এলৰ টাইটেল স্পনছ’ৰশ্বিপৰ পৰা ভিভ’ কোম্পানীয়ে নাম প্রত্যাহাৰ কৰাত ব’ড কিছু ক্ষতিৰ সন্মুখীন হৈছে৷ এই সকলো ক্ষতি লাঘৱ কৰিবলৈ ব’র্ডে উচিত কার্যব্যৱস্থা গ্রহণ কৰিব লাগিব৷’ বিষয়াগৰাকীয়ে এইদৰে কয়৷ উল্লেখ্য যে ভাৰত আৰু চীনৰ মাজত শেহতীয়াকৈ সৃষ্টি হোৱা সংঘাতৰ পৰিণতিত চাইনীজ ম’বাইল নির্মাণ কোম্পানী ভিভ’ৱে চলিত বর্ষৰ আই পি এলৰ টাইটেল স্পনছ’ৰশ্বিপৰ পৰা নাম প্রত্যাহাৰ কৰে৷ ইয়াৰ বিকল্প হিচাপে বি চি চি আয়ে ড্রীম ইলেভেনক বাছনি কৰিছে যদিও ভিভ’ৰ পৰা লাভ কৰা ধনৰ তুলনাত সেয়া যথেষ্ট কম৷
ভিভ’ৰ পৰা ব’র্ডে বছৰি ৪৪০ কোটি লাভ কৰিছিল৷ কিন্তু ড্রীম ইলেভেনৰ পৰা বি চি চি আয়ে চলিত বর্ষৰ আই পি এলৰ টাইটেল স্পনছ’ৰশ্বিপৰ বিনিময়ত মাত্র ২২২ কোটি টকাহে উপার্জন কৰিবলৈ সক্ষম হ’ব৷ এনে প্রেক্ষাপটত অনাগত দিনত ভাৰতীয় খেলুৱৈৰ মজুৰি কর্তনৰ সম্ভাৱনা যথেষ্ট বৃদ্ধি পাইছে৷ ইতিমধ্যে অষ্ট্রেলিয়া, ইংলেণ্ড, ৱেষ্ট ইণ্ডিজ আৰু নিউজিলেণ্ড ক্রিকেট ব’র্ডে তেওঁলোকৰ খেলুৱৈসকলৰ দৰমহা কর্তন কৰি আর্থিক মন্দাৱস্থাৰ পৰা সকাহ লাভৰ চেষ্টা চলাইছে৷