বিশেষ বাৰ্তা, ১২ জুনঃ বিশ্ব টেষ্ট চেম্পিয়নশ্বিপৰ ফাইনেলত ভাৰতীয় ক্রিকেট দল অষ্ট্রেলিয়াৰ হাতত পৰাজিত হোৱাৰ সময়তে ভাৰতীয় হকীত এটি স্বর্ণ দিনৰ সূচনা কৰে জুনিয়ৰ মহিলা দলে ৷ চাৰিবাৰৰ চেম্পিয়ন দক্ষিণ কোৰিয়াক ২–১ গ’লত পৰাস্ত কৰি মহিলাৰ জুনিয়ৰ এছিয়া কাপ হকী প্রতিযোগিতাত ভাৰতে প্রথমবাৰৰ বাবে খিতাপ অর্জন কৰিছে ৷ জাপানত অনুষ্ঠিত প্রতিযোগিতাখনৰ ফাইনেলত ভাৰতীয় দলটোৱে এই বিজয়েৰে ইতিহাস সৃষ্টি কৰিছে৷ উল্লেখ্য যে মহিলাৰ এছিয়ান জুনিয়ৰ হকী প্রতিযোগিতাত ভাৰতৰ এইটোৱেই প্রথম খিতাপ ৷ মেচখনৰ প্রথম কোৱার্টাৰত কোনো এটা দলেই গ’ল দিবলৈ সক্ষম হোৱা নাছিল ৷ ২২ মিনিটত এটি পেনাল্টী কর্নাৰৰ সদ্ব্যৱহাৰ কৰি অন্নুৱে ভাৰতক অগ্রগতি প্রদান কৰে ৷ মেচখনত অগ্রগতি অর্জন কৰাৰ পিছত ভাৰতীয় দলটোৱে অধিক উজ্জীৱিত প্রদর্শন দাঙি ধৰে ৷ কিন্তু ইয়াৰ কিছু সময়ৰ পিছতে দক্ষিণ কোৰিয়াই সমতা স্থাপন কৰে ৷ দলটোৰ ষ্ট্রাইকাৰ পার্ক চিউ ইয়নে এটি দর্শনীয় গ’লেৰে নিজ দলক মেচখনলৈ ওভতাই আনে ৷ খেলৰ ৪১ মিনিটত দক্ষিণ কোৰিয়াৰ গ’লকীপাৰক পৰাভূত কৰি ভাৰতৰ নীলমে গ’ল দি দলৰ বিজয় নিশ্চিত কৰে ৷ ইয়াৰ পিছত দক্ষিণ কোৰিয়া দলটোৱে আক্রমণাত্মক ৰূপ ধাৰণ কৰিলেও গ’ল দিয়াত ব্যর্থ হয় ৷ দলটোৱে কেইবাটাও সুন্দৰ সুযোগ অথলে নিয়ায় ৷ উল্লেখ্য যে ইয়াৰ পূর্বে ২০১২ চনত ভাৰতে ফাইনেলত প্রৱেশ কৰিছিল ৷ কিন্তু সেইবাৰ চীনৰ বিপক্ষে ২–৫ গ’লত পৰাজিত হোৱাত ভাৰতৰ খিতাপৰ আশা নির্বাপিত হৈছিল ৷ কিন্তু কালি ভাৰতে প্রতিযোগিতাখনত প্রথমবাৰৰ বাবে ট্রফী জয় কৰি ইতিহাস সৃষ্টি কৰে৷