নিয়মীয়া বাৰ্তা, ২৭ আগষ্টঃ অৱশেষত জল্পনা–কল্পনাৰ অৱসান ঘটিল৷ বার্চিলোনাৰে প্রায় দুই দশকজোৰা মধুৰ সম্পর্কৰ অৱসান ঘটাবলৈ সাজু হৈছে ফুটবলৰ ৰাজপুত্র লি’নেল মেছি৷ কেৰিয়াৰৰ প্রায় ২০ বছৰ অতিক্রম কৰা বার্চিলোনাৰ সৈতে সম্পর্ক ছেদ কৰিবলৈ ইচ্ছুক বুলি স্পেনিছ ক্লাবটোক আনুষ্ঠানিকভাৱে জনাই দিছে ছুপাৰ ষ্টাৰ মেছিয়ে৷ মন কৰিবলগীয়া যে শেহতীয়াকৈ চেম্পিয়নছ লীগৰ কোৱার্টাৰ ফাইনেলত বেয়ার্ন মিউনিখৰ হাতত বার্চিলোনা ২–৮ গ’লত বিধ্বস্ত হোৱাৰ পিছতে বার্চিলোনাৰ নৱনিযুক্ত প্রশিক্ষক ৰ’নাল্ড ক’মেনৰ সৈতে মেছিৰ সংঘাত সৃষ্টি হোৱা বুলি বাতৰি প্রকাশ পাইছিল৷
ক’মেনৰ সৈতে সংঘাত তীব্রতৰ হোৱাৰ বাবে বার্চিলোনাৰ তাৰকাগৰাকীয়ে ক্লাবটোৰ সৈতে থকা প্রায় দুটা দশকৰ সম্পর্কৰ অন্ত পেলোৱাৰ ইচ্ছা ব্যক্ত কৰিছে বুলি স্পেনিছ সংবাদ মাধ্যমত প্রকাশ পাইছে৷ ইফালে, মেছিয়ে বার্চিলোনা ত্যাগ কৰিবলৈ ইচ্ছা প্রকাশ কৰাৰ পিছতে মানচেষ্টাৰ চিটী, পেৰিছ ছেইণ্ট জার্মেইন আৰু ইণ্টাৰ মিলানকে ধৰি ইউৰোপৰ কেইবাটাও আগশাৰীৰ দলে তাৰকাগৰাকীৰ সৈতে যোগাযোগ আৰম্ভ কৰিছে৷ উল্লেখ্য যে বার্চিলোনাৰ সৈতে মেছি ২০২১ৰ জুন মাহলৈ চুক্তিবদ্ধ হৈ আছে৷ ইয়াৰ পূর্বে কোনো ক্লাবে তেওঁক ক্রয় কৰিব বিচাৰিলে প্রথমে বার্চিলোনাক ৭০ কোটি ইউৰো অর্থাৎ ভাৰতীয় হিচাপত প্রায় ৬,১৬০ কোটি ট্রেন্সফাৰ ফী হিচাপে আদায় দিব লাগিব৷
শেহতীয়াকৈ জানিব পৰা অনুসৰি মেছিয়ে মানচেষ্টাৰ চিটীৰ হৈ খেলিবলৈ মন বান্ধিছে৷ কিয়নো, দলটোৰ মেনেজাৰৰ দায়িত্বত আছে মেছিৰ একালৰ প্রশিক্ষক পেপ গার্ডি’লা৷ উল্লেখ্য যে বার্চিলোনাৰ হৈ এতিয়ালৈকে মুঠ ৪৮৫খন মেচ খেলা মেছি হ’ল ছবাৰ বেলন ডি অ’ৰ বঁটা জয় কৰা বিশ্বৰ একমাত্র ফুটবলাৰ৷ স্পেইনৰ আগশাৰীৰ দলটোৰ হৈ তেওঁ ১০টা লা লিগা খিতাপ, ৬টা কোপা ডেল ৰে, ৪টা চেম্পিয়নছ লীগ আৰু তিনিটা ক্লাব ৱর্ল্ড কাপৰ খিতাপ জয় কৰিবলৈ সক্ষম হৈছে৷