নিয়মীয়া বাৰ্তা ২৮ ডিচেম্বৰঃ অষ্ট্রেলিয়াৰ বিৰুদ্ধে ঐতিহাসিক বক্সিং ডে’ টেষ্টত দায়িত্বপূর্ণ শতকেৰে উজলি উঠা আজিংক্য ৰাহানেৰ প্রশংসাত পঞ্চমুখ হৈ পৰিছে টীম ইণ্ডিয়াৰ নিয়মীয়া অধিনায়ক বিৰাট কোহলি৷ কিছুদিন পূর্বে ৰাহানেৰ কান্ধত ভাৰতীয় দলৰ নেতৃত্বৰ দায়িত্ব অর্পণ কৰি স্বদেশলৈ ওভতা তাৰকাগৰাকীয়ে ভাৰপ্রাপ্ত অধিনায়কগৰাকীৰ ধৈর্যশীল বেটিঙক ভূয়সী প্রশংসা কৰে৷
‘আমাৰ বাবে আৰু এটা সুন্দৰ দিন৷ টেষ্ট ক্রিকেটৰ প্রকৃত ৰূপ সৌন্দর্য পুনৰ এবাৰ দেখিবলৈ পোৱা গ’ল৷ সঁচাকৈয়ে ৰাহানেৰ ইনিংছটো আছিল দুর্দান্ত৷’ টুইটাৰত কোহলিয়ে এইদৰে কয়৷ উল্লেখ্য যে দলৰ বিপর্যয় ৰোধ কৰি ৰাহানেই দ্বিতীয় দিনৰ খেলৰ অন্তলৈ ১০৪ ৰানত বেটিং কৰি আছে৷
ইফালে, ৰাহানেৰ সাহসী ইনিংছটোক অতুলনীয় আৰু অনবদ্য আখ্যা দিছে প্রাক্তন ক্রিকেটাৰ বীৰেন্দ্র সেৱাগ, যুৱৰাজ সিং, মহম্মদ কাঈফ, ভি ভি এছ লক্ষ্মণ আদিয়ে৷ একালৰ কিংবদন্তি বেটছমেন সুনীল গাভাস্কাৰেও ৰাহানেৰ চতুৰ নেতৃত্ব আৰু সাহসী বেটিঙক ভূয়সী প্রশংসা কৰিছে৷