নিয়মীয়া বাৰ্তা, ১৭ ডিচেম্বৰঃ অষ্ট্রেলিয়াৰ বিৰুদ্ধে টেষ্ট শৃংখলাৰ অন্তিম তিনিখন মেচত টীম ইণ্ডিয়াক নেতৃত্ব দিবলগীয়া আজিংক্য ৰাহানেক পূর্ণ সমর্থন আগবঢ়াইছে নিয়মীয়া অধিনায়ক বিৰাট কোহলিয়ে৷ প্রথম টেষ্টৰ পূর্বে এক সংবাদ মেলত তাৰকাগৰাকীয়ে কয় যে ৰাহানেৰ সৈতে তেওঁৰ সম্পর্ক পাৰস্পৰিক বিশ্বাস আৰু সন্মানৰ আধাৰত প্রতিষ্ঠিত৷ তেওঁৰ অনুপস্থিতিত ৰাহানেই ভাৰতীয় দলক সুন্দৰভাৱে পৰিচালিত কৰিবলৈ সক্ষম হ’ব বুলিও কোহলিয়ে উল্লেখ কৰে৷
‘বহু বছৰ ধৰি ৰাহানেৰ সৈতে মোৰ এক বিশ্বাস আৰু সন্মানৰ আধাৰত প্রতিষ্ঠিত সম্পর্ক আছে৷ খেলপথাৰতো আমি কেইবাবাৰো দীঘলীয়া ইনিংছ খেলিবলৈ সক্ষম হৈছোঁ৷ মোৰ অনুপস্থিতিত তেওঁ দলক সুন্দৰভাৱে আগুৱাই নিব পাৰিব৷ অধিনায়ক হিচাপে তেওঁ ইতিমধ্যে দক্ষতাৰ পৰিচয় দিছে আৰু প্রস্তুতি মেচতো আমি ইয়াৰ ফল দেখিবলৈ পাইছোঁ৷ শৃংখলাটোত ৰাহানে বেটছমেন হিচাপে সফল হোৱাৰ লগতে অধিনায়ক হিচাপেও সফল হ’ব বুলি মই আশাবাদী৷’ কোহলিয়ে এইদৰে কয়৷
উল্লেখ্য যে আজিৰ পৰা আৰম্ভ হোৱা প্রথম টেষ্টৰ সামৰণিৰ পিছতে টীম ইণ্ডিয়াৰ অধিনায়কগৰাকী পিতৃত্বকালীন ছুটীৰ বাবে স্বদেশলৈ উভতি আহিব৷ তেওঁৰ অনুপস্থিতিত ৰাহানেই দলক নেতৃত্ব দিব৷