নিয়মীয়া বাৰ্তা ৭ ছেপ্টেম্বৰঃ একমাত্র ভাৰতীয় হিচাপে বর্তি থকা ৰোহন বোপান্নাই চলিত ইউ এছ অ’পেনৰ পুৰুষ শাখাৰ ডাবলছৰ কোৱার্টাৰ ফাইনেলত স্থান সুৰক্ষিত কৰিছে৷ কানাডাৰ ডেনিছ ছাপ’ভাল’ভৰ সৈতে যুটি বন্ধা বোপান্নাই দ্বিতীয় ৰাউণ্ডৰ মেচ এখনত ষষ্ঠ বাছনিপ্রাপ্ত কেভিন ক্রাৱিটজ আৰু আণ্ড্রেছ মিয়েছ যুটিক পৰাস্ত কৰি কোৱার্টাৰ ফাইনেললৈ উন্নীত হয়৷
এঘণ্টা ৪৭ মিনিট ধৰি চলা মেচখনত অবাছনিপ্রাপ্ত ইণ্ডো–কানাডা যুটিটোৱে জার্মানীৰ যুটিটোক কিছু সংগ্রামৰ মূৰত ৪–৬, ৬–৪, ৬–৩ ছেটত পৰাস্ত কৰে৷ অন্তিম ৮ত বোপান্না–ছাপ’ভাল’ভ যুটিয়ে নেদাৰলেণ্ডছৰ জিল–জুলিয়েন ৰ’জেৰ আৰু ৰোমানিয়াৰ হ’ৰিয়া টেকাও যুটিৰে প্রতিদ্বন্দ্বিতা আগবঢ়াব৷
উল্লেখ্য যে সুমিত নাগল আৰু ডিভিজ ছাৰনে প্রতিযোগিতাখনৰ পৰা বিদায় লোৱাৰ পিছত একমাত্র ভাৰতীয় হিচাপে গ্রেণ্ডশ্লামখনত বর্তি আছে ৰোহন বোপান্না৷