নিয়মীয়া বাৰ্তা, ৩১ মেঃ প্রায় দুটা দশকজুৰি আন্তঃৰাষ্ট্রীয় ক্রিকেটত দপ্দপাই থাকি ইটোৰ পিছত সিটো অভিলেখ স্থাপন কৰিলেও বর্ণিল কেৰিয়াৰত দুটা বিশেষ আক্ষেপ থাকি গ’ল মাষ্টাৰ ব্লাষ্টাৰ শচীন তেণ্ডুলকাৰৰ৷ এটা ৱেবছাইটৰ স’তে হোৱা সাক্ষাৎকাৰত একালৰ কিংবদন্তি বেটছমেনগৰাকীয়ে কয় যে সুনীল গাভাস্কাৰৰ সৈতে আৰু ছাৰ ভিভিয়ান ৰিচার্ডছৰ বিৰুদ্ধে খেলিব নোপোৱাৰ আক্ষেপে তেওঁক এতিয়াও দুখ দিয়ে৷
‘জীৱনত মোৰ দুটাই আক্ষেপ থাকি গ’ল৷ প্রথমটো হ’ল মই কেতিয়াও সুনীল গাভাস্কাৰৰ স’তে খেলাৰ সুযোগ নাপালোঁ৷ গাভাস্কাৰৰ খেল উপভোগ কৰিয়েই মই ক্রিকেটৰ প্রতি আকর্ষিত হৈছিলোঁ৷ মই আন্তঃৰাষ্ট্রীয় ক্রিকেটত অভিষেক ঘটোৱাৰ কেইবছৰমান পূর্বে গাভাস্কাৰে অৱসৰ গ্রহণ কৰে৷ এয়া মোৰ জীৱনৰ এক আক্ষেপ হৈ ৰ’ব৷’ –ক্রিকেটৰ ভগৱান খ্যাত শচীন তেণ্ডুলকাৰে এইদৰে কয়৷
ইফালে, টেষ্ট ক্রিকেটত ১৫,৯২১ ৰান সংগ্রহ কৰি ২০১৩ চনত অন্তঃৰাষ্ট্রীয় ক্রিকেটক বিদায় জনোৱা প্রাক্তন ক্রিকেটাৰগৰাকীয়ে পুনৰ কয় যে শৈশৱৰ নায়ক ছাৰ ভিভিয়ান ৰিচার্ডছৰ বিৰুদ্ধে খেলিব নোপোৱাটো তেওঁৰ কেৰিয়াৰৰ দ্বিতীয়টো আক্ষেপ৷ ‘মোৰ আন এটা আক্ষেপ হ’ল শৈশৱৰ নায়ক ছাৰ ভিভিয়ান ৰিচার্ডছৰ বিৰুদ্ধে খেলাৰ সুযোগ নাপালোঁ৷ কাউণ্টি ক্রিকেটত তেওঁৰ বিৰুদ্ধে খেলাৰ সৌভাগ্য অর্জন কৰিছিলোঁ যদিও আন্তঃৰাষ্ট্রীয় ক্রিকেটত কেতিয়াও তেওঁৰ মুখামুখি হ’ব নোৱাৰিলোঁ৷’ –শচীনে এইদৰে কয়৷ উল্লেখ্য যে ১৯৯১ চনত ভিভিয়ান ৰিচার্ডছে অৱসৰ গ্রহণ কৰিছিল৷