🔹 ৰঘুবংশী–ভেংকটেশৰ অর্ধশতকেৰে জয় কলকাতা নাইট ৰাইডার্ছৰ
নিউজ ডেস্ক, ৪ এপ্রিল : ছানৰাইজার্ছ হায়দৰাবাদে চলিত আইপিএলৰ প্রথমখন মেচত দুর্দান্ত বিজয় সাব্যস্ত কৰিছিল যদিও পৰৱর্তী মেচত জয়ৰ ধাৰা অব্যাহত ৰখাত সম্পূর্ণৰূপে ব্যর্থ হয়৷ প্রতিযোগিতাখনত পৰাজয়ৰ হেটট্রিকৰ সন্মুখীন হয় ছানৰাইজার্ছ৷ কালি কলকাতাৰ ইডেন গার্ডেনত অনুষ্ঠিত মেচখনত ছানৰাইজার্ছ হায়দৰাবাদে ঘৰুৱা দল তথা ডিফেণ্ডিং চেম্পিয়ন কলকাতা নাইট ৰাইডার্ছৰ হাতত ৮০ ৰানত পৰাস্ত হয়৷ কলকাতাই জয়ৰ বাবে বান্ধি দিয়া ২০১ ৰানৰ লক্ষ্য অনুসৰণ কৰিবলৈ আহি বৈভৱ আৰোৰা আৰু বৰুণ চক্রৱর্তীৰ চমকপ্রদ বলিঙৰ সন্মুখত বেটিং বিপর্যয় হৈ ছানৰাইজার্ছে ১৬.৪ অভাৰত আটাইকেইটা উইকেট হেৰুৱাই ১২০ ৰানহে কৰিবলৈ সক্ষম হয়৷ দলটোৰ হৈ সর্বাধিক ৩৩ ৰান কৰে হেনৰিচ ক্লাছেনে৷ কামিণ্ডু মেণ্ডিছে ২৭, নীতিশ কুমাৰ ৰেড্ডীয়ে ১৯ আৰু অধিনায়ক পেট কামিনছে ১৪ ৰান কৰে৷ দলটোৰ সাতগৰাকী বেটাৰে দহকৰ ঘৰ স্পর্শ কৰাত ব্যর্থ হয়৷ কলকাতাৰ হৈ বৈভৱ আৰোৰা আৰু বৰুণ চক্রৱর্তী উভয়ে সর্বাধিক তিনিটাকৈ উইকেট লাভ কৰে৷ ইয়াৰ পূর্বে প্রথমে বেটিং কৰিবলৈ আহি প্রাৰম্ভিক বিপর্যয় সত্ত্বেও অংকুশ ৰঘুবংশী আৰু ভেংকটেশ আয়াৰৰ দুর্দান্ত অর্ধশতকৰ সহায়ত কলকাতা নাইট ৰাইডার্ছে নির্ধাৰিত ২০ অভাৰত ৬টা উইকেট হেৰুৱাই ২০০ ৰান সংগ্রহ কৰে৷ ইনিংছৰ আৰম্ভণি মুঠেই সুখকৰ নাছিল ডিফেণ্ডিং চেম্পিয়ন দলটোৰ৷ দলীয় স্ক’ৰ ১৬ ৰানতে অ’পেনাৰদ্বয় কুইণ্টন ডি ক’ক (১) আৰু সুনীল নাৰিন (৭)ক হেৰুৱায়৷ অৱশ্যে অধিনায়ক আজিংক্য ৰাহানে আৰু ৰঘুবংশীয়ে তৃতীয় উইকেটত ৮১ ৰান সংগ্রহ কৰি দলৰ বিপর্যয় কিছু ৰোধ কৰে৷ ৰাহানেই ২৭টা বলত ৩৮ ৰান কৰি বিদায় লয় যদিও ৰঘুবংশীয়ে ৩২টা বলত ৫টা চাৰি আৰু ২টা ছয়েৰে ৫০ ৰানৰ গুৰুত্বপূর্ণ অৰিহণা আগবঢ়ায়৷ ৰাহানে আউট হোৱাৰ কিছু সময়ৰ পিছতে ৰঘুবংশীয়েও বিদায় লয়৷ সেই সময়ত দলটোৰ স্ক’ৰ আছিল ৪ উইকেটত ১০৬ ৰান৷ অৱশ্যে ২৯টা বলত ৭টা চাৰি আৰু ৩টা ছয়েৰে ৬০ ৰানৰ দুর্দান্ত ইনিংছ খেলা ভেংকটেশে ৰিংকু সিঙৰ সৈতে লগ লাগি পঞ্চম উইকেটত ৯১ ৰান সংগ্রহ কৰি কলকাতাক শক্তিশালী স্থিতিত উপনীত কৰায়৷ ৰিংকু সিঙে ১৭টা বলত ৪টা চাৰি আৰু এটা ছয়েৰে ৩২ ৰান কৰি অপৰাজিত হৈ থাকে৷ আন্দ্রে ৰাছেলে মাত্র ১ ৰান কৰি পেভিলিয়নমুখী হয়৷ ছানৰাইজার্ছৰ হৈ মহম্মদ ছামি, পেট কামিনছ, জিছান আনছাৰি, হর্ষল পেটেল আৰু কামিণ্ডু মেণ্ডিছে এটাকৈ উইকেট লাভ কৰে৷ উল্লেখ্য যে কলকাতাই চাৰিখন মেচৰ দুখনত জয় আৰু দুখনত পৰাজয়ৰ সন্মুখীন হৈছে৷