🔹 প’ৰ্ট এলিজাবেথত আজি দ্বিতীয় টি–২০
নিউজ ডেস্ক, ১০ নৱেম্বৰ : ঘৰুৱা দল দক্ষিণ আফ্রিকা আৰু টীম ইণ্ডিয়াৰ মাজৰ চাৰিখনীয়া টি–২০ মেচৰ শৃংখলাটোৰ দ্বিতীয়খন মেচ আজি প’ৰ্ট এলিজাবেথত অনুষ্ঠিত হ’ব৷ প্রথমখন মেচত সহজ বিজয় সাব্যস্ত কৰি আত্মবিশ্বাস তুংগত থকা ভাৰতীয় দলটোৱে আজিৰ মেচতো বিজয় সাব্যস্ত কৰি শৃংখলাটোত ২–০ৰ অগ্রগতি লাভ কৰাৰ লক্ষ্য লৈছে৷ উল্লেখ্য যে প্রথমখন মেচত ভাৰতে দক্ষিণ আফ্রিকাক ৬১ ৰানত পৰাস্ত কৰি শৃংখলাটোত ১–০ৰ অগ্রগতি লৈছে৷ প্রথমে বেট ধৰি সঞ্জু ছেমছনৰ বিস্ফোৰক ১০৭ আৰু তিলক বার্মাৰ ৩৩ ৰানৰ সহায়ত ভাৰতে নির্ধাৰিত ২০ অভাৰত ৮ উইকেটত ২০২ ৰান কৰে৷ প্রত্যুত্তৰত ঘৰুৱা দলটোৱে ১৭.৫ অভাৰত ১৪১ ৰানতে ইনিংছ সামৰে৷ দলটোৰ হৈ সর্বাধিক ২৫ ৰান কৰে হেনৰিচ ক্লাছেনে৷ জেৰাল্ড ক’টজীয়ে ২৩ ৰানৰ অৱদান আগবঢ়ায়৷ ভাৰতীয় দলটোৰ হৈ বৰুণ চক্রৱর্তী আৰু ৰবি বিষ্ণই উভয়ে ৩টাকৈ, আভেছ খানে ২ আৰু অর্শদীপ সিঙে ১টা উইকেট লাভ কৰে৷ আজি খেলৰ সময় : নিশা ৭.৩০ বজা৷